Qazaqstan soltústik óńirlerdi gazdandyrý úshin Reseımen kelissóz júrgizip jatyr
ASTANA. KAZINFORM — Qazaqstannyń soltústik oblystary men Astanany tabıǵı gazben qamtamasyz etý úshin Reseıden gaz jetkizý múmkindigi qarastyrylady.
Bul týraly QR Energetıka vıtse-mınıstri Qaıyrhan Tutqyshbaev málimdedi. Onyń aıtýynsha, Qazaqstan Úkimeti «Gazprom» kompanııasymen «Saryarqa» qoldanystaǵy gaz tasymaldaý júıesin Reseıdiń Ishım qalasy mańyndaǵy («Karasýl» kompressorlyq stantsııasy) gaz qubyrymen baılanystyratyn jańa magıstraldyq gaz qubyryn salý máselesi boıynsha kelissózder júrgizip jatyr.
— Bul Qazaqstannyń soltústik óńirlerin — Petropavl jáne Kókshetaý qalalaryn, sondaı-aq Astana qalasyn tabıǵı gazben qamtamasyz etýge jáne gaz jetkizý baǵyttaryn ártaraptandyrýǵa múmkindik beredi, — dedi Qaıyrhan Tutqyshbaev.
Vıtse-mınıstrdiń málimetinshe, ótken jyldyń qazan aıynda Sankt-Peterbýrg qalasynda ótken Peterbýrg halyqaralyq gaz forýmy aıasynda Qazaqstan Úkimeti men «Gazprom» arasynda tıisti memorandýmǵa qol qoıylǵan.
— Memorandým Reseı Federatsııasynan Qazaqstan Respýblıkasyna jańa magıstraldyq gaz qubyryn salý jobasyn iske asyrýdy kózdeıdi. Joba aıasynda 2030 jyldan bastap Qazaqstannyń soltústik óńirleri men Astana qalasyn gazben jabdyqtaý úshin Reseı gazyn 6,3 mlrd tekshe metrge deıin jetkizý múmkindigi qarastyrylǵan, — dedi ol.
Joba aıasynda uzyndyǵy shamamen 540 shaqyrym bolatyn magıstraldyq gaz qubyryn salý josparlanǵan.
Qaıyrhan Tutqyshbaevtyń aıtýynsha, qazirgi ýaqytta Reseı tarapymen kelissózder jalǵasyp jatyr.
— Túpkilikti ýaǵdalastyqtarǵa qol jetkizilgennen keıin jáne soltústik óńirlerdi gazdandyrý boıynsha jobalaý-smetalyq qujattama ázirlengen soń, taýarlyq gazdy jetkizý sharttary men magıstraldyq gaz qubyrynyń baǵyty aıqyndalatyn bolady, — dedi vıtse-mınıstr.
Eske salaıyq, Qazaqstandy gazdandyrý deńgeıi 64%-dan asqan.
