Qazaqstan Soltústik Makedonııamen saýda aınalymyn arttyrmaq

ASTANA. QazAqparat – Qazaqstan Soltústik Makedonııaǵa eksport kólemin arttyrady. Bul týraly QR Premer-Mınıstriniń orynbasary – Syrtqy ister mınıstri Murat Nurtileý málim etti, dep habarlaıdy QazAqparat tilshisi.

«Býıar Osmanı myrza ekeýmiz ekonomıkalyq seriktestiktiń órisin odan ári keneıtý memleketterimizdiń múddesine saı ekenin málimdep, ózara tyǵyz jumysty jalǵastyrý qajet dep topshyladyq. Bul rette, saýda aınalymynyń oń dınamıkasy quptaldy. 2022 jyldyń nátıjesi boıynsha ekijaqty saýda aınalymy 5,5 ese ósti. Salystyrmaly túrde kólem az bolǵanmen, onyń bolashaǵy zor. Qazirdiń ózinde bizdiń elimizdiń eksport kólemin arttyryp, ekijaqty saýda aınalymyn 350 mln dollarǵa jetkizý múmkindigi bar», - dedi Murat Nurtileý elordada Soltústik Makedonııa Syrtqy ister mınıstri, Eýropadaǵy qaýipsizdik jáne yntymaqtastyq uıymynyń tóraǵasymen kezdesý barysynda.

Mınıstrdiń aıtýynsha, Qazaqstan Soltústik Makedonııanyń óńirdegi turaqtylyqty qamtamasyz etý jónindegi bastamalaryn qoldaýǵa daıyn.

«Soltústik Makedonııanyń halyqaralyq terrorızm men ekstremızmge, esirtki men qarýdyń zańsyz aınalymyna, zańsyz kóshi-qonmen kúres, sondaı-aq shekara qaýipsizdigi sııaqty máselelerge erekshe nazar aýdaratynyn qoshtaımyz», - dedi M. Nurtileý.

Aıta keteıik, qazaqstandyqtar Soltústik Makedonııaǵa vızasyz qatynýy múmkin.

Buǵan deıin habarlaǵanymyzdaı, búgin elordaǵa Soltústik Makedonııa Syrtqy ister mınıstri – Eýropadaǵy qaýipsizdik jáne yntymaqtastyq uıymynyń is basyndaǵy tóraǵasy Býıar Osmanı resmı saparmen keldi.