Qazaqstan Soltústik Koreıanyń ıadrolyq problemasyn sheshý úshin óz alańyn usynýǵa daıyn

NЬıÝ-IORK. QazAqparat - Qazaqstan «ıadrolyq bestiktiń» KHDR-diń qaýipsizdigine kepildik berýin jaqtaıdy. Bul týraly búgin BUU Qaýipsizdik keńesiniń «Jappaı qyryp-joıatyn qarýdy taratpaý: sharalar men senim» taqyrybyndaǵy otyrysynda sóz sóılegen Qazaqstan Prezıdenti Nursultan Nazarbaev aıtty, dep habarlaıdy QazAqparat.

«Irannyń ıadrolyq baǵdarlamasyna qatysty mámile qarýdy taratpaý salasyndaǵy kópjaqty dıplomatııanyń tabysty bolatynyn kórsetti. Ol kúrdeli máselelerdi kelissózder arqyly sheshýdiń tájirıbe júzindegi mysalyna aınaldy. Osy kelisim Qazaqstan da óz úlesin qosqan senim ahýalynyń arqasynda júzege asty», - dede Memleket basshysy.

Qazaqstan Prezıdenti kelisimge keıbir qatysýshylar tarapynan óz mindettemelerin júzege asyrýda týyndaǵan qıyndyqtarǵa qaramastan is-qımyldy tolyqtaı qamtıtyn birlesken jospar odan ári tabysty iske asady dep senetindigin bildirdi.

«Osyndaı konstrýktıvti tásildi Soltústik Koreıanyń ıadrolyq problemasyn retteýde de qoldanýǵa bolady dep oılaımyz. Koreıa túbegindegi qazirgi oqıǵalar tereń qarama-qaıshylyqtyń bar ekenin bildirdi. Osyǵan oraı, múddeli taraptardyń Soltústik Koreıa máselesin neǵurlym jyldam ári konstrýktıvti jolmen sheshýge shaqyramyz. Senim ahýalyn qalyptastyrýdyń jáne Phenıanniń kelissóz ústeline oralýynyń mańyzdy sharty retinde «ıadrolyq bestiktiń» KHDR-diń qaýipsizdigine kepildik berýin jaqtaımyz. Múddeli taraptar qajet etken jaǵdaıda, Qazaqstan kelissóz alańyn usynýǵa daıyn», - dedi Nursultan Nazarbaev.