Qazaqstan «Sochı-2014» Olımpıadasyna 40-tan astam sportshy jibermek
ASTANA. 14 mamyr. QazAqparat - Qazaqstan «Sochı-2014» Olımpıadasyna 40-tan astam joldama utýdy josparlaýda. Bul týraly búgin QR Sport jáne dene shynyqtyrý isteri agenttigi tóraǵasynyń orynbasary Elsııar Qanaǵatov málim etti.
«Sochı Olımpıadasyna joldama sarapqa salynatyn jarystarǵa daıyndyq jumystary júrip jatyr. Joldama beriletin jarystar endigi jyldyń qańtaryna deıin bolady. Qańtar aıynan keıin ǵana bizdiń ulttyq quramadan qansha sportshy Aq Olımpıadaǵa baratyny belgili bolady. Qazirgi tańda bizdiń qorjynda 22 joldama bar. Aıtar bolsaq, bıatlonnan 10 joldama bar, mánerlep syrǵanaýdan - 2, taý shańǵysynan - 3, konkımen júgirýden - 3, frıstaıldan - 3 jáne 1 joldama snoýbordtan. Biraq bul sportshylar áli álem kýboginiń kezeńderine qatysýlary shart, olaı bolmaǵan jaǵdaıda ol joldamadan aıyrylyp qalý múmkindigi bar. Sondyqtan biz barlyq sportshylardy joldama beriletin jarystarǵa qatysýyna qajetti qarajatpen qamtamasyz etýdemiz. Jalpy jospar boıynsha, biz Sochıge 10 sport túrinen 40-tan astam joldama utýdy mejelep otyrmyz. Vankýver Olımpıadasynda bizde 8 sport boıynsha 37 joldama alynǵan bolatyn», - dedi E.Qanaǵatov.
Onyń aıtýynsha, Qazaqstan Reseıde ótetin Olımpıada jarystarynan 2 altyn júlde qorjynǵa salýdy maqsat etip otyr.
«Bizde shańǵy, mánerlep syrǵanaýdan, konkıden, frıstaıldan júlde ala alatyn myqty sportshylar bar. Topshylaýymyzsha, Sochıde Vankýverdegi nátıjeden joǵary kórsetkish kórsetý kerekpiz. Kem degende 2 altyn medal alýdy josparlap otyrmyz. Ol qaı sport túrinen bolatyny joldamalyq jarystardan keıin árbir sportshynyń daıyndyǵyna qatysty bolady. Atap ótsek, Alekseı Poltoranın men Nıkolaı Chebotko shańǵy sportynan, Denıs Ten mánerlep syrǵanaýdan, Denıs Kýzın konkıden, frıstaıldan Galysheva, Reıhard degen sportshylar, snoýbordtan jas sportshymyz - Valerııa Tsoı jaqsy óner kórsetip júr, bıatlonnan Elena Hrýstaleva da daıyndalyp jatyr», - dep túıdi sózin agenttik basshysynyń orynbasary.
