Qazaqstan SІM Serbııada qaza tapqan qazaqstandyq áıeldiń ólimin rastady
ASTANA. KAZINFORM – Qazaqstan Respýblıkasynyń Syrtqy ister mınıstrligi Belgradta qaza tapqan Qazaqstan azamatynyń isin baqylaýǵa alǵanyn málimdedi.
29 shilde kúni qaza bolǵan qazaqstandyqtyń ákesi áleýmettik jelide qyzynyń Serbııanyń Belgrad qalasyna jumys isteýge barǵanyn jáne onyń iz-túzsiz joǵalyp ketkenin habarlady. Onyń aıtýynsha, qyzy baılanysqa shyǵýyn toqtatqan.
Kelesi kúni ákesi qyzynyń qaza tapqanyn málimdedi. Áleýmettik jelilerde taraǵan málimetke sáıkes, boıjetken Belgradtaǵy turǵyn úıdiń altynshy qabatynan qulap ketken.
QR Syrtqy ister mınıstrligi Qazaqstan azamatynyń qaza bolǵanyn rastady. Vedomstvo bul jaǵdaıdy erekshe baqylaýǵa alǵan.
– Qazaqstan Respýblıkasynyń Syrtqy ister mınıstrligi Serbııada qaza tapqan azamatshamyzdyń týǵan-týystary men jaqyndaryna qaıǵyra kóńil aıtady. Qazaqstannyń Serbııadaǵy elshiligi jergilikti quzyrly organdarmen birlesip, oqıǵanyń barlyq mán-jaıyn anyqtaý jumystaryn júrgizip jatyr, – dep habarlady.
Qazirgi ýaqytta qazaqstandyq dıplomattar marqumnyń týystarymen turaqty baılanysta bolyp, olarǵa jan-jaqty konsýldyq jáne quqyqtyq qoldaý kórsetip jatyr.
Buǵan deıin, QR Іshki ister mınıstrliginiń baspasóz qyzmeti qazaqstandyq eks-sýdıa Aıgúl Saılybaevanyń ólimine qatysty qylmystyq is boıynsha jańa málimetter bergen edi.
