Qazaqstan SІM basshysynyń Reseıge resmı sapary: Kósherbaev pen Lavrov neni talqylady
MÁSKEÝ. KAZINFORM — Kezdesý barysynda syrtqy saıası vedomstvolardyń basshylary kópjyldyq dostyq, ózara qurmet pen túsinistik dástúrlerine negizdelgen qazaq-reseı strategııalyq seriktestigi men odaqtastyǵynyń keń aýqymdy máselelerin talqylady, dep habarlaıdy QR SІM baspasóz qyzmeti.
Sondaı-aq halyqaralyq jáne óńirlik kún tártibindegi ózekti máseleler boıynsha pikir almasty. Bıyl 12 qarashada ótetin Qazaqstan Respýblıkasynyń Prezıdenti Qasym-Jomart Toqaevtyń Reseı Federatsııasyna memlekettik saparyna daıyndyq máselelerine erekshe nazar aýdaryldy.
— Memleket basshylarymyz arasyndaǵy senimdi baılanystar ekijaqty qatynastardyń damýynda sheshýshi ról atqarady. Joǵary deńgeıdegi turaqty dıalog barlyq yntymaqtastyq baǵyttarynyń serpinin aıqyndap, birlesken bastamalardyń dáıekti ilgerileýin qamtamasyz etedi, — dep málimdedi E.Kósherbaev.
Óz kezeginde S. Lavrov strategııalyq seriktestik pen tatý kórshilik qaǵıdattaryna negizdelgen saıası dıalogtyń sabaqtastyǵyn rastaı otyryp, eki el kóshbasshylary arasyndaǵy erekshe qatynastary qazaq-reseı yntymaqtastyǵynyń barlyq keshenine serpin beretinin atap ótti.
Taraptar óńiraralyq jáne shekara mańy baılanystaryn nyǵaıtý, saýda-ekonomıkalyq jáne ınvestıtsııalyq ózara is-qımyldy keńeıtý, ónerkásip, energetıka, kólik pen logıstıka, aýyl sharýashylyǵy salalaryndaǵy birlesken jobalardy júzege asyrý máselelerin egjeı-tegjeıli qarastyrdy. Bul baǵyttar turaqty óndiristik baılanystardy qalyptastyrýǵa jáne azyq-túlik pen energetıkalyq turaqtylyqty nyǵaıtýǵa múmkindik beretini atalyp ótti.
— Reseı Qazaqstan úshin jetekshi saýda jáne ınvestıtsııalyq seriktes bolyp qala beredi. 2024 jyldyń qorytyndysy boıynsha ózara taýar aınalymy 28 mlrd AQSh dollarynan asyp, jańa rekordtyq kórsetkishke jetti. Ekijaqty saýdany 30 mlrd AQSh dollaryna deıin jetkizý jóninde bıik mindet qoıyldy. Ótken jyly Reseı Qazaqstan ekonomıkasyna 4 mlrd AQSh dollary kóleminde ınvestıtsııa salyp, eń iri ınvestor atandy, — dedi Qazaqstan SІM basshysy.
Osy turǵyda taraptar Qazaqstan-Reseı úkimetaralyq yntymaqtastyq komıssııasynyń, salalyq qosalqy komıssııalardyń jáne óńiraralyq yntymaqtastyq forýmynyń ekijaqty baılanystardy damytýdaǵy mańyzdy rólin atap ótti.
Qazaq-reseı qatynastarynda dástúrli túrde erekshe oryn alatyn mádenı-gýmanıtarlyq baılanystardy odan ári damytý máselesi kezdesýdiń jeke taqyryby retinde qaraldy. Reseıde Qazaqstannyń jáne onyń óńirleriniń mádenıet kúnderin, al Qazaqstanda Reseı óńirleriniń mádenıet kúnderin ótkizý, sondaı-aq Astanada «Qazaqstan men Reseıdiń máńgi dostyq alleıasyn», Máskeý memlekettik halyqaralyq qatynastar ınstıtýtynyń fılıalyn jáne ál-Farabı atyndaǵy Qazaq ulttyq ýnıversıtetiniń Ombydaǵy fılıalyn ashý halyqtar arasyndaǵy tatý kórshilikti nyǵaıtýǵa degen ortaq umtylysty aıqyn kórsetedi.
Sonymen qatar taraptar TMD, EAEO jáne UQShU sheńberindegi kópjaqty yntymaqtastyq tetikterin jetildirý jáne óńirlik qaýipsizdik arhıtektýrasyn nyǵaıtý máseleleri boıynsha pikir almasty.
Sońynda taraptar Eýrazııa óńirinde beıbitshilik, turaqtylyq jáne órkendeýdi qamtamasyz etýge baǵyttalǵan jan-jaqty strategııalyq seriktestikti nyǵaıtý baǵytyn jalǵastyrý nıetterin rastady.
Eske salsaq, Qazaqstan Respýblıkasynyń Syrtqy ister mınıstri Ermek Kósherbaev Reseı Federatsııasynyń Syrtqy ister mınıstri Sergeı Lavrovtyń shaqyrýymen Reseıge resmı saparmen bardy.
Buǵan deıin Reseıdiń Syrtqy ister mınıstri Sergeı Lavrov Qazaqstan Prezıdenti Qasym-Jomart Toqaevtyń qarasha aıyndaǵy Reseıge memlekettik sapary shyn máninde halyqaralyq aýqymdaǵy oqıǵa ekenin aıtty.
Sonymen qatar ol azaqstannyń Reseımen birlesken «Báıterek» jobasy aıaqtalýǵa jaqyn ekenin alǵa tartty.
Budan bólek Qazaqstan men Reseı jetinshi Kaspıı sammıtin Iranda ótkizý bastamasyn qoldady.