Qazaqstan Slovenııanyń farmatsevtıka kompanııasymen birlesken kásiporyn qurýy múmkin
ASTANA. KAZINFORM – Astanada Qazaqstan-Slovenııa kásipkerlik forýmy ótip jatyr. Kazakh Invest ulttyq kompanııasy basqarma tóraǵasynyń orynbasary Madııar Sultanbek atalǵan forým el ekonomıkasyna ne beretinin aıtty.
- Búgingi bıznes-forým Slovenııa Respýblıkasy Prezıdentiniń Qazaqstanǵa alǵashqy resmı sapary aıasynda ótýde. Mártebeli meıman ózimen birge elindegi ondaǵan jetekshi bıznesmenderden quralǵan isker delegatsııany ala keldi.
Onyń kóbi slovenııalyq kompanııalardyń birinshi menedjerleri, bas dırektorlary, dırektorlar keńesiniń músheleri.
Slovenııa bıznesiniń ókilderi negizinen farmatsevtıka sııaqty salalarda jumys isteıdi. Slovenııadaǵy eń iri kompanııalardyń biri – Krka kompanııasy. Bizdiń elimizde de farmatsevter arasynda óte tanymal.
Qazir ol kompanııanyń bizdegi ókildikteri saýda seriktes retinde ǵana jumys isteıdi. Qazaqstandyq farmatsevtıkalyq kompanııalar osy kásiporynmen birlesken óndiris qurýǵa nıetti. Forým aıasynda osy másele de talqylanady, - deıdi Kazakh Invest basshysynyń orynbasary.
Slovenııa Prezıdentimen kelgen delegatsııanyń quramynda IT jáne telekommýnıkatsııa salasynyń ókilderi de bar.
- Bizdiń bul naryqta birneshe slovenııalyq kompanııalar jumys istep jatyr. Biz joǵary bilikti, baǵalary salystyrmaly túrde qolaıly slovenııalyq kompanııalarmen yntymaqty nyǵaıtýǵa úmittenemiz.
Al energetıka salasynyń ókilderimen jańartylatyn energııa kózderi boıynsha jobalardy talqylaý kózdelgen. Delegatsııada qurylys salasynyń ókilderi de bar, - dedi Madııar Sultanbek.
Qazir Qazaqstan men Slovenııa arasyndaǵy taýar aınalymy 100 mln dollardan, bul eldiń bizge salǵan ınvestıtsııasynyń kólemi 200 mıllıon dollardan sál asady.
- Bul eki el áleýetiniń sharyqtaý shegi emes, árıne.
Forým aıasynda ekijaqty B2B uıymdastyrylady. Ol kezdesýlerge «Atameken» ulttyq kásipkerler palatasy men tıisti memlekettik organdar súıemeldeıdi, - dedi Kazakh Invest ókili.
Madııar Sultanbektiń sózinshe, Batys Eýropa men Qazaqstan arasynda kólik baılanysyn toǵyz joldyń torabynda jatqan Slovenııanyń áleýeti arqyly tıimdi ete túsýge bolady.
- Meniń oıymsha, Qazaqstan men Slovenııa úshin júk tasymaldaýdyń ózara tıimdi tarıfterin belgileý asa qıynǵa soqpaý kerek. Búgingi forým qorytyndysy boıynsha birneshe kommertsııalyq memorandýmdar men kelisimderge qol qoıýdy josparlap otyrmyz. Ol ýaǵdalastyqtardyń jalpy somasyn qazir aıtý qıyn. Óıtkeni forým aıasynda bul kelissózderdiń aqyrǵy satysy júrip jatyr, - dedi ol.
Eske salsaq, keshe Slovenııa Prezıdenti Natasha Pırts-Mýsar elimizge resmı saparmen kelip, kelissóz qorytyndysy boıynsha birqatar qujatqa qol qoıylǵan edi.