Qazaqstan Slovakııaǵa munaı-gaz, ýran jáne basqa da taýarlaryn eksporttaýǵa daıyn - Prezıdent
ASTANA. KAZINFORM – Qazaqstan Slovakııamen qarym-qatynasty odan ary nyǵaıtýǵa basa mán beredi. Bul týraly Slovakııa Premer-mınıstri Robert Fıtsomen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.
- Búgin Premer-mınıstr Robert Fıtso myrza ekeýimiz mazmuny kelissózder júrgizdik. Qazaq-slovak yntymaqtastyǵynyń aıasyn keńeıtý máselesin talqyladyq. Naqty ýaǵdalastyqtarǵa qol jetkizdik. Eki el arasynda eshqandaı túsinispeýshilik joq. Keń aýqymdy yntymaqtastyqqa jol ashyq. Sebebi Qazaqstan men Slovakııanyń san qyrly baılanysyn kúsheıtý qos halyqtyń múddesine saı keledi. Slovakııa ekonomıka turǵysynan alyp qarasaq, qarqyndy damyp kele jatqan el. Sondyqtan Qazaqstan Slovakııamen qarym-qatynasty odan ary nyǵaıtýǵa basa mán bermek, - dedi Qasym-Jomart Toqaev.
Memleket basshysy kelissózder barysynda saýda-sattyq kólemin odan ary arttyrý máselesi qozǵalǵanyn, ınvestıtsııalyq yqpaldastyqty tereńdetýge nazar aýdarylǵanyn aıtty.
- Bul turǵydan alǵanda úkimetaralyq komıssııa mańyzdy ról atqaryp keledi. Men komıssııanyń teń tóraǵalarynyń deńgeıin mınıstr deńgeıine kóterýdi usyndym. Qazaqstan Slovakııaǵa munaı-gaz, ýran, azyq-túlik ónimderin jáne basqa da taýarlaryn eksporttaýǵa daıyn. Sondaı-aq energetıka, mashına jasaý, aýyl sharýashylyǵy, tsıfrlandyrý, týrızm salasynda birlesken jobalardy júzege asyrýǵa múmkindik bar. Áskerı-tehnıkalyq baılanystyń áleýeti zor”, - dedi Prezıdent.
Buǵan deıin Memleket basshysy Qasym-Jomart Toqaev Slovakııa Premer-mınıstri Robert Fıtsomen shaǵyn quramda kelissóz júrgizgenin jazǵan edik.
Al keńeıtilgen quramdaǵy kelissóz barysynda Memleket basshysy Slovakııa Qazaqstannyń Eýropalyq odaqtaǵy mańyzdy ári senimdi seriktesi ekenin aıtty.