Qazaqstan sııaqty kórshimizdiń bolǵanyna qýanýymyz kerek – Qyrǵyzstan ǵalymy
Bul týraly QR Prezıdenti Qasym-Jomart Toqaevtyń Qyrǵyzstanǵa memlekettik sapary qarsańynda Qyrǵyz-Reseı ýnıversıtetiniń Ulttyq ekonomıka jáne óńirlik damý kafedrasynyń meńgerýshisi, professor Asylbek Aıýpov málim etti, dep habarlaıdy QazAqparat tilshisi.
«Qazaqstan men Qyrǵyzstan baýyrlas ári kórshiles elder. Burynnan bizdiń memleketter arasynda tyǵyz qarym-qatynas qalyptasqan. Bizdiń otbasymyzǵa toqtalsaq, meniń anam qazaq. Asharshylyq jyldarynda naǵashy atam osynda qonystanǵan. Sonymen qatar, meniń qyzym qazaq jigitine turmysqa shyqty, ıaǵnı bizde týystyq jáne baýyrlastyq baılanystar óte jaqyn ekenin baıqaýǵa bolady. Sondyqtan kebireýler qalamasa da, obektıvti turǵyda bizdiń elder tyǵyz yntymaqtastyqta bolýy tıis. Atap aıtqanda, ekonomıkalyq jáne mádenı qarym-qatynastarymyzǵa erekshe ekpin qoıǵan jón. Terrıtorııalyq ári ekonomıkalyq áleýetterimiz ártúrli, sondaı-aq Qazaqstannyń damý qarqyny aıtarlyqtaı joǵary», - dedi ǵalym.
Osy oraıda ol Nur-Sultan qalasynda 2017 jyly EKSPO halyqaralyq kórmesiniń, ózge de álemdik deńgeıdegi sharalardyń ótkizilýi Qazaqstannyń dúnıejúzilik arenadaǵy bedelin aıǵaqtap otyrǵanyn atap ótti.
«Eki eldiń shekaralasatyn óńirleri aýqymdy terrıtorııany alyp jatyr. Sondyqtan Qazaqstan sekildi kórshimiz bar ekenine qýanyp, maqtan tutýymyz kerek. Taýar aınalym baǵytyna toqtalsaq, bul salaǵa biraz jyldardan beri nazar aýdarylyp keledi. Investıtsııalyq baǵytta Qazaqstan jaǵy tenderlerge qatysyp keledi, ıaǵnı elimizde altyn óndirý, taý-ken ónerkásibin qamtyp jatyr. Budan bólek, qazaq ınvestıtsııalary qurylys materıaldary ónerkásibine belsendi tartylýda. Degenmen de, birlesken kásiporyndardy qurý áleýeti áli de joǵary. Aýyl sharýashylyǵy bizdiń ekonomıkanyń eleýli úlesin alyp jatyr. Biz qaıta óńdeý ónerkásibin damytý qajettigin únemi aıtyp kelemiz. Meniń oıymsha, Qazaqstannan ósimdik maıyn jáne basqa da daıyn ónimderdi alyp kelemiz, bul salalarda qazaqstandyq bızneste eleýli tájirıbe bar. Bul turǵyda qyrǵyz tarapyna seriktesterdi alystan izdemeı, kórshimizben birge aýyl sharýashylyǵy ónimderin óńdeý boıynsha birlesken kásiporyndardy qurǵan tıimdi bolar edi. Osy jobalar eki elge de eleýli paıda túsiredi dep sanaımyn», - dedi Asylbek Aıýpov.
Bul rette ǵalym Qazaqstan Prezıdentiniń sapary kezinde atalǵan taqyryptardy Qyrǵyzstan Úkimeti belsendi kóterýi kerektigin jetkizdi.
«Memleket basshylary eki el qarym-qatynasynda ońtaıly túzetýlerge erekshe mán beredi dep oılaımyn. Osy oraıda ózara múddelestik bar, elderimiz arasynda bir-birine degen janashyrlyq bar. Sondyqtan aldaǵy joǵary deńgeıdegi kezdesýde talqylaıtyn taqyryptar da, usynystar da bar», - dedi professor.
Budan buryn habarlanǵandaı, 27 qarashada Qazaqstan Prezıdenti Qasym-Jomart Toqaev Qyrǵyzstan Prezıdenti Sooronbaı Jeenbekovtiń shaqyrýymen Qyrǵyzstanǵa memlekettik saparmen barady.
Kelissózder barysynda eki el basshylary Qazaqstan men Qyrǵyzstan arasyndaǵy strategııalyq seriktestiktiń qazirgi ahýaly men perspektıvalaryn talqylaıdy jáne kezdesý qorytyndysy boıynsha birqatar ekijaqty qujattarǵa qol qoıady dep josparlanýda.
