Qazaqstan Syrtqy ister mınıstri Túrkııa Prezıdentiniń qabyldaýynda boldy
ASTANA. KAZINFORM — Ankaraǵa resmı sapary aıasynda Qazaqstan Syrtqy ister mınıstri Ermek Kósherbaevty Túrkııa Prezıdenti Redjep Taııp Erdoǵan qabyldady, dep habarlaıdy QR SІM baspasóz qyzmeti.
Suhbat barysynda Redjep Taııp Erdoǵan ekijaqty yntymaqtastyqtyń keńeıtilgen strategııalyq seriktestik deńgeıinde qarqyndy damyp kele jatqanyn qanaǵattanýshylyqpen atap ótip, eki el arasyndaǵy kópjosparly ózara is-qımyldy jan-jaqty damytýdyń mańyzdylyǵyna erekshe toqtaldy.
Sonymen qatar Qazaqstan Respýblıkasynyń Syrtqy ister mınıstri Ermek Kósherbaev Túrkııa Respýblıkasyna resmı sapary aıasynda Qazaqstan-Túrkııa birlesken strategııalyq josparlaý tobynyń 8-shi otyrysyna qatysty. Qazaqstannyń Syrtqy ister mınıstri Ermek Kósherbaev pen Túrkııanyń Syrtqy ister mınıstri Hakan Fıdannyń teń tóraǵalyǵymen ótken otyrys barysynda saıası, saýda-ekonomıkalyq, ınvestıtsııalyq, kólik-tranzıttik, IT, sondaı-aq mádenı-gýmanıtarlyq baılanystardy qosa alǵanda, ekijaqty jáne kópjaqty yntymaqtastyqtyń keń aýqymdy máseleleri talqylandy.
Ermek Kósherbaev Túrkııanyń Qazaqstannyń iri saýda-ekonomıkalyq seriktesteriniń biri ekenin atap ótti.
— Osy oraıda ózara saýdany joǵary áleýeti bar salalarda, ásirese aýyl sharýashylyǵy ónimderi baǵytynda arttyrý boıynsha praktıkalyq qadamdardy jandandyrýdyń mańyzdylyǵyn atap ótkim keledi. Qazaqstan túrik tutynýshylary úshin sapaly azyq-túlik ónimderiniń senimdi jetkizýshisi bola alady, — dedi Kósherbaev.
Otyrysta ınvestıtsııalyq saladaǵy yntymaqtastyqty odan ári damytý máselelerine erekshe nazar aýdaryldy. Qazaqstannyń Syrtqy ister mınıstri túrik ınvestıtsııalarynyń Qazaqstan ekonomıkasynyń damýyna eleýli úles qosyp otyrǵanyn atap ótti. Túrkııanyń Qazaqstan ekonomıkasyna salǵan ınvestıtsııa kólemi 5 mlrd AQSh dollarynan assa, Qazaqstannyń Túrkııaǵa salǵan ınvestıtsııasy 2,2 mlrd AQSh dollarynan asty. Bul – túrik ınvestorlarynyń Qazaqstanǵa degen seniminiń jáne elde ınvestıtsııalyq qyzmet júrgizýge qolaıly jaǵdaılardyń bar ekeniniń aıqyn dáleli.
Sondaı-aq, Ermek Kósherbaev túrik seriktesteriniń nazaryn ınvestorlardyń quqyqtaryn qorǵaýǵa jáne memlekettik qoldaý sharalaryn ońtaılandyrýǵa baǵyttalǵan zańnamalyq bazany jetildirý boıynsha Qazaqstanda qabyldanyp jatqan sharalarǵa aýdardy. Atap aıtqanda, qazir ınvestorlarǵa salyqtyq jáne kedendik jeńildikter, turaqtylyq kepildikteri, sýbsıdııalar men granttar, sondaı-aq ınvestorlar úshin arnaıy vızalyq rejımdi qosa alǵanda, keń aýqymdy preferentsııalar usynylyp otyr.
Taraptar mádenı-gýmanıtarlyq saladaǵy yntymaqtastyqtyń túrli aspektilerin de talqylady. 2023 jyly oryn alǵan joıqyn jer silkinisiniń saldaryn joıý maqsatynda baýyrlas túrik halqyna kómek kórsetý jónindegi Qazaqstan Prezıdenti Qasym-Jomart Toqaevtyń tapsyrmasyn iske asyrýǵa erekshe nazar aýdaryldy. Osy jumys aıasynda Qazaqstan aǵymdaǵy jyly Gazıantep provıntsııasynda mektep qurylysyn aıaqtaýdy josparlap otyr.
Budan bólek otyrysta Qazaqstan men Túrkııanyń halyqaralyq kún tártibi boıynsha yntymaqtastyǵy jáne kópjaqty formattar aıasynda ózara qoldaý kórsetý máseleleri qaraldy. Kósherbaev túrki ıntegratsııasy Qazaqstannyń kópjaqty dıplomatııasyndaǵy basym baǵyttardyń biri ekenin atap ótti. Bıyl Qazaqstanda Túrki memleketteri uıymynyń beıresmı sammıtin ótkizý josparlansa, Túrkııada kezekti 13-shi Sammıt ótedi. Óz sózinde QR Syrtqy ister mınıstri aldaǵy kezdesýlerdiń mańyzdylyǵyna nazar aýdardy.
Otyrys qorytyndysy boıynsha Qazaqstan men Túrkııanyń syrtqy ister mınıstrlikteri arasyndaǵy 2026-2027 jyldarǵa arnalǵan yntymaqtastyq josparyna qol qoıyldy. Ótken kelissózderdiń qorytyndysyn shyǵara otyryp, taraptar onyń nátıjelerine qanaǵattanýshylyq bildirip, Qazaqstan Syrtqy ister mınıstriniń Ankaraǵa sapary Qazaqstan men Túrkııa arasyndaǵy dástúrli berik baılanystardyń damýyna jańa serpin beretinine senim bildirdi.
Buǵan deıin Prezıdent Ermek Kósherbaevqa ekonomıkalyq dıplomatııany kúsheıtýdi tapsyrǵan edi.