Qazaqstan Syrtqy ister mınıstri Reseı Elshisin qabyldady
ASTANA. KAZINFORM – Qazaqstan Respýblıkasynyń Syrtqy ister mınıstri Ermek Kósherbaev Reseı Federatsııasynyń Elshisi Alekseı Borodavkındi qabyldady.
Dıplomat RF Syrtqy ister mınıstri Sergeı Lavrovtyń Ermek Kósherbaevty QR SІM basshysy bolyp taǵaıyndalýymen quttyqtaýyn jetkizdi.
Taraptar kópqyrly ekijaqty yntymaqtastyqtyń qazirgi jaǵdaıy men damý perspektıvalaryn talqylap, onyń strategııalyq seriktestik pen odaqtastyq rýhynda dáıekti damyp kele jatqanyn atap ótti.
Erekshe nazar Qazaqstan Respýblıkasynyń Prezıdenti Qasym-Jomart Toqaevtyń aldaǵy Reseı Federatsııasyna memlekettik saparyna daıyndyq máselelerine aýdaryldy. Bul is-sharanyń ekijaqty baılanystardy barlyq baǵyt boıynsha jandandyrýdaǵy joǵary mańyzy rastaldy.
Kezdesý barysynda óńirlik jáne halyqaralyq kún tártibindegi ózekti máseleler boıynsha pikir almasý ótti. Suhbattastar yntymaqtastyqty odan ári nyǵaıtýǵa jáne halyqaralyq arenada is-qımyldardy tyǵyz úılestirýge daıyndyǵyn rastady.
Eske sala keteıik, budan buryn Ermek Kósherbaev Qazaqstan Respýblıkasynyń Syrtqy ister mınıstri bolyp taǵaıyndalǵanyn habarlǵan edik.