Qazaqstan syrtqy saýda talaptarynyń ashyqtyǵyn arttyrdy
ASTANA.KAZINFORM - Qazaqstan Respýblıkasy Saýda jáne ıntegratsııa mınıstrligi «QazTrade» AQ-men birlesip syrtqy ekonomıkalyq qyzmetke qatysýshylar men bıznes úshin Qazaqstan Respýblıkasynda qoldanylatyn tarıftik emes retteý sharalary (tyıym salýlar, shekteýler, tehnıkalyq talaptar, tańbalaý talaptary jáne t.b.) týraly aqparattyń ashyqtyǵyn arttyrý jáne qoljetimdiligin qamtamasyz etý boıynsha jumysty jalǵastyrý ústinde, dep habarlaıdy mınıstrliktiń baspasóz qyzmeti.
Osy jumys sheńberinde Qazaqstan tarıftik emes retteý sharalary týraly málimetterdi BUU-nyń ıÝNKTAD halyqaralyq derekter bazasy – TRAINS Portal júıesinde ornalastyryp jatyr. Atalǵan platforma syrtqy ekonomıkalyq qyzmetke qatysýshylar, sarapshylar men ınvestorlar tarapynan halyqaralyq saýdada qoldanylatyn erejeler men talaptar týraly ózekti aqparattyń senimdi kózi retinde keńinen paıdalanylady.
Aıta keteıik, TRAINS Portal halyqaralyq saýdada qoldanylatyn sanıtarııalyq, fıtosanıtarııalyq, tehnıkalyq, sandyq, shekteý qoıýshy, tyıym salýshy jáne ózge de sharalar týraly málimetterdi qamtıtyn biryńǵaı halyqaralyq platforma bolyp tabylady.
Búgingi tańda júıede Qazaqstan Respýblıkasynda qoldanylatyn tarıftik emes retteýdiń 549 sharasy týraly derekter jarııalanǵan. Olar Qazaqstan Respýblıkasy men Eýrazııalyq ekonomıkalyq odaqtyń 96 normatıvtik quqyqtyq aktisi bólinisinde usynylǵan.
Jarııalanǵan tarıftik emes retteý sharalary syrtqy saýdany júzege asyrý kezinde qoldanylatyn talaptardyń keń aýqymyn qamtıdy. Atap aıtqanda, bul ımport pen eksportqa qatysty tyıymdar men shekteýler, ónimdi sertıfıkattaý jáne sáıkestikti rastaý talaptary, mindetti tańbalaý qaǵıdalary, sanıtarııalyq jáne fıtosanıtarııalyq talaptar, jekelegen taýar túrlerin lıtsenzııalaý, sondaı-aq tehnıkalyq jáne ákimshilik retteýdiń ózge de sharalary.
Mysaly, engizilgen derekterdiń edáýir bóligi ónimniń sáıkestigin baǵalaý talaptaryna qatysty, onyń ishinde mindetti sertıfıkattaý jáne deklaratsııalaý rásimderi, synaqtar júrgizý jáne tehnıkalyq reglamentterdiń talaptaryna sáıkestikti rastaý sharalary qamtylǵan.
Atap aıtqanda, derekqorda ónimniń sáıkestigin baǵalaý men sertıfıkattaýǵa qatysty shamamen 93 shara, synaqtar men ınspektsııalardy júrgizýdi kózdeıtin 29-ǵa jýyq shara, sondaı-aq ónimge qoıylatyn 49 tehnıkalyq talap qamtylǵan. Sonymen qatar tutynýshylar úshin tańbalaý jáne aqparat usyný jónindegi shamamen 40 talap, azyq-túlik ónimderi men janýarlar jáne ósimdikterden alynatyn taýarlarǵa qatysty 15-ke jýyq sanıtarııalyq talap, sondaı-aq jekelegen taýar sanattarynyń ımporty men eksporty kezinde qoldanylatyn 12 ruqsat berý rásimi engizilgen.
Barlyq sharalar ıÝNKTAD-tyń halyqaralyq ádisnamasyna sáıkes aǵylshyn tilinde engizilgen. Árbir shara boıynsha onyń sıpattamasy, halyqaralyq synyptamaǵa sáıkes kody, qoldanylý merzimi jáne retteý qoldanylatyn taýarlar tizbesi kórsetiledi.
Derekterdiń ózektiligin qamtamasyz etýge erekshe nazar aýdarylady. Aqparat jarııalanar aldynda jan-jaqty tekserýden ótkiziledi. Jumys Qazaqstan Respýblıkasy men EAEO zańnamasyndaǵy ózgeristerdi eskere otyryp, turaqty negizde júzege asyrylady.
Aqparattyń halyqaralyq júıede ornalastyrylýy Qazaqstannyń saýda sharalaryn syrtqy ekonomıkalyq qyzmetke qatysýshylar úshin neǵurlym ashyq, túsinikti jáne boljamdy etýge múmkindik berdi. Otandyq eksporttaýshylar úshin bul retteýshi aqparatqa qoljetimdilikti jeńildetip, syrtqy naryqtarǵa shyǵý kezinde talaptardy izdeýge jumsalatyn ýaqyt shyǵyndaryn qysqartady.
-Osylaısha, tarıftik emes sharalar týraly derekterdi halyqaralyq TRAINS bazasynda júıeleý jáne jarııalaý Qazaqstannyń retteýshi ortasynyń ashyqtyǵy men boljamdylyǵyn arttyrady. Bul syrtqy ekonomıkalyq qyzmetke qatysýshylar men ınvestorlarǵa qoldanystaǵy talaptardy aldyn ala túsinýge múmkindik berip, naryqqa shyǵý kezindegi belgisizdikti azaıtady, saýda operatsııalaryn josparlaýdy jeńildetedi jáne retteýshi aqparatty alýǵa baılanysty shyǵyndardy qysqartady,-delingen habarlamada.
Elektrondy saýdada taýarlardyń tolyq ári naqty statıstıkasy jasalatyny týraly jazdyq.
