Qazaqstan Sırııada qaqtyǵysty bəseńdetý aımaqtaryna qatysty ýaǵdalastyqtaryn quptaıdy

ASTANA. QazAqparat - Qazaqstan Respýblıkasynyń Syrtqy ister mınıstrligi Sırııanyń ońtústik-batysynda qaqtyǵysty bəseńdetý aımaqtary boıynsha AQSh pen Reseı arasynda qol jetkizilgen ýaǵdalastyqtar qorytyndysy boıynsha məlimdeme jasady, dep habarlaıdy mınıstrliktiń baspasóz qyzmeti.

Qazaqstan Amerıka Qurama Shtattary men Reseı Federatsııasy arasynda Sırııanyń ońtústik-batysynda qaqtyǵysty bəseńdetý aımaqtaryna qatysty sońǵy ýaǵdalastyqtaryn quptaıdy.

2017 jylǵy 9 shildeden bastap Sırııanyń Əl-Qýneıtra, Dera jəne As-Sýıeda provıntsııalarynda bitimniń ornatylýy búkil Sırııa jerinde soǵys amaldaryn tolyǵymen toqtatý jolyndaǵy taǵy bir naqty qadam bolyp tabylady.

Sırııalyq qaqtyǵysty múmkindiginshe tez arada retteýge múddeli barlyq taraptardy, onyń ishinde SAR úkimeti men oppozıtsııasyn soǵys amaldaryn toqtatý rejımin saqtaýǵa shaqyramyz. 

Sırııada beıbitshilik pen turaqtylyqty qaıta ornatý úshin Reseı men AQSh jəne basqa da múddeli taraptar arasynda syndarly ózara is-qımyldyń damıdy degen senimdimiz.

BUU aıasynda Sırııa jónindegi Jenevalyq beıbit kelissózderge tolyq qoldaýymyzdy bildiremiz jáne sırııalyq daǵdarysty retteýdiń saıası protsesi sheńberinde naqty sheshimderge qol jetkiziledi dep senemiz.

Qazaqstan Respýblıkasy Sırııada urys amaldaryn toqtatý rejımin nyǵaıtý boıynsha Astana protsesiniń sheńberindegi beıbit kelissózderdiń jalǵasýy úshin jaǵdaılardy odan ári qamtamasyz etýge daıyn.