Qazaqstan sırek metall óndirisiniń 4 baǵytyna basymdyq bermekshi

ASTANA. KAZINFORM – Ónerkásip jáne qurylys mınıstriniń orynbasary Oljas Saparbekov Úkimet otyrysynda sırek metall óndirisin damytýdyń basym baǵyttaryn atady.

Premer-mınıstr Oljas Bektenov vıtse-mınıstrden sırek metall salasyn damytý qalaı uıymdastyrylyp jatqanyn suraǵan.

Oljas Saparbekov bul baǵyttaǵy jumystar Prezıdent tapsyrmasynyń aıasynda atqarylyp jatqanyn eske saldy.

- Memleket basshysynyń tapsyrmasyn oryndaý aıasynda 2024-28 jyldarǵa arnalǵan sırek jáne sırek jerde sırek kezdesetin metaldar salasyn damytý jónindegi keshendi jospar qabyldanyp, iske asyrylyp jatyr. Geologııalyq barlaý boıynsha sırek metalǵa qatysty 11 ýchaskede izdeý jumystary aıaqtalyp, Quıryqtykól perspektıvaly ken orny anyqtaldy. Al óndiris salasyna kelsek, elde 8 kásiporyn jumys istep, biregeı ónim shyǵarady. Óndiristik múmkindikter men álemdik suranysty eskere otyryp, 4 baǵyt aıqyndaldy. Birinshi – batareıa materıaldary. Ekinshi – ystyqqa tózimdi qorytpalar. Úshinshi – jartylaı ótkizgish materıaldar jáne tórtinshi – turaqty magnıtter, - dedi ol.

Sondaı-aq ol Qazaqstan bul salada Eýroodaq elderimen, Ulybrıtanııa, Ońtústik Koreıa, Qytaı, Japonııa sııaqty memlekettermen seriktestik ornatyp jatqanyn eske saldy.

Sırek metall Qazaqstan úshin ekinshi munaı bolýy múmkin degen dámeli boljamdardy jıi estıtin boldyq. Bul boljamdar da kezinde «qara altynnyń» býymen aıtylyp ketken «Keleshekte Dýbaıdaǵydaı ómir súremiz» degen atyshýly popýlıstik urannyń aıaǵyn qushpaıtynyna kim kepil? Sırek metall ındýstrııasy munaı-gaz ónerkásibiniń qateligin qaıtalap júrmeı me? Agenttik tilshisi osy suraqqa jaýap izdep kórdi.