Qazaqstan sırek metaldardy óńdep, Eýropaǵa daıyn ónim eksporttamaq
ASTANA. KAZINFORM — Qazaqstan belgııalyq kompanııalardy metall óńdeý, jańa óndiris oryndaryn ashý, ónerkásiptik jabdyqtar jetkizý jáne logıstıka salalaryndaǵy jobalarǵa ınvestıtsııa salýǵa shaqyrdy. Bul baǵyttardy Ónerkásip jáne qurylys vıtse-mınıstri Oljas Saparbekov asa mańyzdy mıneraldar týraly semınarda tanystyrdy.
Belgııalyq bıznes ókilderimen kezdesýde vıtse-mınıstr Qazaqstan ónerkásibin damytýdyń tórt basym baǵytyn atady. Olar — akkýmýlıator óndirisine qajetti materıaldar, ystyqqa tózimdi arnaıy qorytpalar, jartylaı ótkizgish materıaldar jáne turaqty magnıtter óndirisi.
Sonymen birge, daıyn ónimdi Eýropa naryǵyna jetkizý máselesine erekshe nazar aýdaryldy. Bul rette Qazaqstan Belgııanyń logıstıkalyq múmkindikterin paıdalanýdy kózdelgen.
— Antverpen porty daıyn ónimdi Eýropa naryǵyna jetkizetin negizgi qaqpalardyń biri bolyp qala beredi. Jobalardy qarjylandyrý úshin Eýropalyq komıssııanyń DG INTPA baǵdarlamalary men Eýropalyq ınvestıtsııalyq bank sııaqty eýropalyq qarjy quraldaryn Qazaqstannyń memlekettik qoldaý sharalarymen ushtastyrýǵa bolady, — dedi Oljas Saparbekov.
Al Qazaqstanda eýropalyq kompanııalardyń óndirisin jersindirý josparlanyp otyr.
— Qazaqstan kásiporyndarynda polımetall kenderi, kontsentrattar, aralyq ónimder men óndiris qaldyqtary kóp. Olardyń quramynda basqa metaldarmen birge kezdesetin ilespe metaldar da bar. Qazir olardyń bir bóligi óndirilgenimen, barlyǵy tolyq ıgerilip jatqan joq. Osy oraıda Qazaqstan Aurubis, Campine jáne Nyrstar sııaqty kompanııalarmen yntymaqtastyq ornatýǵa múddeli. Biz tehnologııalar men mamandardyń tájirıbesin Qazaqstanǵa kezeń-kezeńimen engizip, óńdeý jumystaryn elimizde júrgizý joldaryn talqylaýǵa daıynbyz, — dedi ol.
Taǵy bir basym baǵyt — metaldardy bólip alý jáne tazartý. Bul sırek metaldary bar shıkizat pen qaıtalama shıkizatty óńdeýdi qamtıdy. Mundaı tehnologııalar metaldardy joǵary tazalyq deńgeıine jetkizip, daıyn ónimniń qosylǵan qunyn arttyrýǵa múmkindik beredi.
Qazaqstan osy baǵytta gıdrometallýrgııa, sırek jer elementterin bólý jáne metaldardy qaıta óńdeý tehnologııalaryn meńgergen kompanııalardyń tájirıbesine súıenbek.
Ónerkásiptik jobalaý men jabdyq jetkizý de — yntymaqtastyqtyń mańyzdy baǵyty sanalady. Oljas Saparbekov áleýetti seriktester qatarynda John Cockerill ınjenerlik kompanııasyn atady.
— Qoldanystaǵy óndiris oryndaryn jańǵyrtý jáne jańa qýattardy jobalaý úshin zamanaýı sheshimder qajet. Sonymen birge jobany tehnıkalyq-ekonomıkalyq negizdeme ázirleýden bastap, óndiristi iske qosýǵa deıin jetkize alatyn ınjenerlik komandalar mańyzdy, — dedi ol.
Aıta keteıik, Qazaqstan Belgııaǵa molıbden kenderi men tıtan eksporttaıdy. Sondaı-aq eki el arasyndaǵy saýdada zyǵyr tuqymy men bıdaı bar. Ásirese, bıdaı jetkizilimi úsh ese artqan.
Eske sala ketsek, Belgııanyń 600 jyldyq tarıhy bar ýnıversıteti Qazaqstanda «Sırek metaldardy baıytý» ortalyǵyn ashady.
Buǵan deıin Belgııalyqtar Koroli Fılıpp Qazaqstannyń baı tarıhymen jáne mádenıetimen jaqyn tanysýǵa nıetti ekenin aıtqan edi.
Óz kezeginde Memleket basshysy Qasym-Jomart Toqaev Qazaqstan men Belgııa arasynda sheshilmegen másele joq ekenin málimdedi.
