Qazaqstan Sıngapýrmen saýda-ekonomıkalyq baılanysty arttyrýǵa múddeli - Máýlen Áshimbaev
ASTANA. KAZINFORM - Senat tóraǵasy Máýlen Áshimbaev Qazaqstanǵa resmı saparmen kelgen Sıngapýr Parlamentiniń Spıkeri Sea Kıan Penmen kezdesti, dep habarlaıdy QR Parlamenti Senatynyń baspasóz qyzmeti.
Suhbat barysynda taraptar ınvestıtsııalyq yntymaqtastyqty arttyrý jáne parlamentaralyq baılanysty odan ári nyǵaıtý máselelerin talqylady.
Óz sózinde Máýlen Áshimbaev meımanǵa iltıpat bildirip, Sıngapýr Qazaqstannyń Ońtústik-Shyǵys Azııa aımaǵyndaǵy mańyzdy seriktesi ekenin atap ótti. Sondaı-aq ol dıplomatııalyq qarym-qatynas ornaǵan 30 jyl ishinde Qazaqstan men Sıngapýr arasynda belsendi saıası dıalog, berik ekonomıkalyq jáne mádenı baılanystar jolǵa qoıylyp, túrli salada berik quqyqtyq negiz qalyptasqanyn aıtty.
«Biz ózara parlamentaralyq yntymaqtastyqty nyǵaıtýǵa jáne Sıngapýr Parlamentimen tájirıbe almasýǵa múddelimiz. Parlamentaralyq dostyq toptarynyń áleýetin jan-jaqty ári tıimdi paıdalanýdyń mańyzy zor. Qazaqstan Sıngapýrmen saýda-ekonomıkalyq baılanysty arttyrýǵa da múddeli. Osyǵan oraı Parlament qajetti quqyqtyq negiz qalyptastyrý úshin belsendi jumys istep keledi. Bıyl Senat Investıtsııalardy kótermeleý jáne ózara qorǵaý týraly kelisimdi ratıfıkatsııalady. Ekijaqty qarym-qatynastardy odan ári nyǵaıtýda Parlamenttiń atqaratyn róli zor», – dedi Máýlen Áshimbaev.
Senat tóraǵasy saýda-ekonomıkalyq jáne ınvestıtsııalyq yntymaqtastyqty arttyrý máselelerin talqylaý barysynda Memleket basshysynyń bastamasymen Qazaqstanda júrgizilip jatqan keshendi áleýmettik-ekonomıkalyq jáne saıası reformalarǵa da toqtaldy. Atap aıtqanda, Qazaqstannyń jańa ekonomıkalyq úlgisin qalyptastyrýǵa jáne ınvestıtsııalyq ahýaldy jaqsartýǵa arnalǵan sharalar sóz boldy.
Sonymen qatar Máýlen Áshimbaev Senattyń zań shyǵarý jumystary, qabyldanǵan Tujyrymdamaǵa sáıkes Álemdik jáne dástúrli dinder kóshbasshylary Sezi Hatshylyǵynyń aldaǵy on jylǵa arnalǵan jumys jospary jaıynda aıtyp ótti. Bul rette ol rýhanı dıplomatııany damytý jolynda birlesken jumystyń mańyzdy ekenin de tilge tıek etti.
Óz kezeginde Sea Kıan Pen Qazaqstanda túrli salada júrgizilip jatqan keshendi reformalardyń nátıjelerin joǵary baǵalap, parlamentaralyq baılanysty nyǵaıtýǵa daıyn ekendikterin jetkizdi.
