Qazaqstan Sıngapýrmen birge 20 mln dollarlyq venchýrlyq qor qurady
NUR-SULTAN. QazAqparat - «Báıterek» UBH» AQ basqarma tóraǵasy Aıdar Áriphanov Qazaqstanda venchýrlyq qor qurý jumysy qalaı júrgizilip jatqanyn aıtyp berdi, dep habarlaıdy QazAqparat tilshisi.
«2019 jyly biz kem degende úsh bıznes-ınkýbatordy qoldaýdy kózdegen edik. Eki qor qurý josparlanǵan. Birinshisi Nazarbaev Ýnıversıtetimen birlese qurylady. Sonymen qatar, sıngapýrlyq kompanııamen birge jalpy qory 20 mln AQSh dollar bolatyn venchýrlyq qor qurýdy kózdep otyrmyz. Osy jyldyń úshinshi toqsanynda tıisti jumys aıaqtalyp qalýy kerek», - deıdi Aıdar Áriphanov Úkimettiń baspasóz ortalyǵynda ótken brıfıng barysynda.
Onyń aıtýynsha, «Damý» qorynan bólek, ártúrli bıznes-josparlardy qoldaý jumysymen QazTech Ventures kompanııasy da aınalysady. Ol kompanııa - Tehnologııalyq damý boıynsha ulttyq agenttiktiń negizinde qurylǵan.
«Bul kompanııa bıznes-ınkýbatorlaýmen aınalysady. Óz kezeginde bıznes-ınkýbator barlyq kezeń boıynsha, atap aıtqanda, jobanyń basynan bastap kommertsıalızatsııalaýǵa deıingi kezeńderde jas kásipkerlerge kómektesedi. Biz QazTech Ventures kompanııasynyń 2023 jylǵa deıingi jańa strategııasyn qabyldadyq. Bizdiń bıznes-ınkýbatorlardyń qazirgi tańdaǵy negizgi problemasy - qor jınaýdyń jetispeýshiliginde. Bul kompanııa óz kezeginde qorlardyń qorlaryna aınalyýy tıis. Ol kompanııa óz aqshasyn jeke ınvestorlarǵa quıyp, jas startaptardy qarjylandyrýy kerek», - deıdi spıker.
