Qazaqstan Sıngapýrdyń Kólik oqıǵalaryn tergeý bıýrosymen memorandýmǵa qol qoıdy

ASTANA. KAZINFORM – IKAO-nyń 42-shi Assambleıasy aıasynda QR Kólik mınıstrligi Azamattyq avıatsııa komıtetiniń tóraǵasy Saltanat Tompıevanyń Sıngapýrdyń Turaqty kólik hatshysy Laý Pıt Meng myrzamen kezdesýi ótti, dep habarlaıdy QR Kólik mınıstrliginiń Avıatsııa komıeti.

Kezdesý barysynda Sıngapýrdaǵy kólik oqıǵalaryn tergeý bıýrosymen (Transport Safety Investigation Bureau, TSIB) ózara túsinistik týraly Memorandýmǵa qol qoıyldy.

Qazaqstan tarapynan qujatqa IKAO janyndaǵy Qazaqstan Respýblıkasynyń Turaqty ókili Tımýr Tilegenov qol qoıdy.

Kelisim Qazaqstan Respýblıkasy men Sıngapýrdyń oqıǵalaryn tergeý jónindegi ýákiletti organdar arasyndaǵy áýe, temirjol jáne teńiz kólik túrlerin tergeý máseleleri boıynsha yntymaqtastyqty kózdeıdi.

Tergeý kezinde personaldy daıarlaýǵa, aqparat pen tájirıbe almasýǵa erekshe nazar aýdarylady.

Qazaqstan men Sıngapýr arasyndaǵy quqyqtyq baza azamattyq avıatsııa salasyndaǵy yntymaqtastyqty damytýǵa múmkindik beredi. Elder arasynda ashyq aspan rejımi bar.

«Bizdiń áýe kompanııalar tikeleı reısterdi ashýdy qarastyryp otyr. Biz Qazaqstanda jumys isteıtin sıngapýrlyq tasymaldaýshylardy qarsy alýǵa qýanyshtymyz», - dedi S.Tompıeva jáne qazaqstandyq avıatsııa salasynyń mamandaryn oqytý baǵdarlamalary úshin alǵysyn bildirdi.

Óz kezeginde Laý Pıt Meng eki el arasynda yntymaqtastyqtyń kóptegen baǵyttary bar ekenin atap ótti.

- Ózara túsinistik týraly Memorandým – bul oqıǵalar men oqıǵalardy tergeý, ozyq tájirıbelermen almasý salasyndaǵy ózara is-qımyldy bastaýdyń alǵashqy qadamy. Ári qaraı biz yntymaqtastyqtyń basqa túrlerin de qamtımyz, -dedi.

Kezdesý sońynda S. Tompıeva Qazaqstan IKAO standarttaryna sáıkes keletin zamanaýı tergeý júıesin qurýǵa umtylatynyn jáne Sıngapýrmen áriptestik joldaǵy mańyzdy qadam bolatynyn atap ótti.

Osyǵan deıin Qazaqstan men Italııa isker toptardyń baılanysyn nyǵaıtatyny týraly jazdyq.