Qazaqstan, Sıngapýr jáne Ulybrıtanııa Tárbıe jónindegi halyqaralyq uıym qurýǵa kirisedi — mınıstr
ASTANA. KAZINFORM — Astanada Azııa, Eýropa jáne Qazaqstannyń professorlary men sarapshylarynyń qatysýymen dóńgelek ústel ótti. Bul týraly Oqý-aǵartý mınıstrligi habarlady.
Talqylaýdyń basty taqyryby — úılesimdi, jaýapty jáne básekege qabiletti tulǵa qalyptastyrýǵa baǵyttalǵan prezıdenttik «Adal Azamat: birtutas tárbıe» baǵdarlamasy boldy.
Oqý-aǵartý mınıstri Ǵanı Beısembaevtyń aıtýynsha, eki jyl ishinde baǵdarlamany júzege asyrý aıasynda alty negizgi baǵyt pen 77 qadamnan turatyn birtutas tárbıe ekojúıesi quryldy. Tárbıe jumysyna synyp jetekshileri, ata-analar men psıhologııalyq qyzmetter belsendi qatysyp jatyr.
2023 jyldan bastap mektepter janynan Ata-analardy pedagogıkalyq qoldaý ortalyqtary, al óńirlerde Psıhologııalyq kómek ortalyqtary jumys istep keledi. Osy ýaqyt ishinde ata-analardyń oqý-tárbıe protsesine qatysý deńgeıi úsh esege artqan. Qazir ata-analar komıtetterin transformatsııalaý jumysy júrip jatyr, al qarasha aıynda «mektep — ata-ana — qoǵam» yntymaqtastyǵyn nyǵaıtýdyń jańa alańyna aınalatyn alǵashqy Respýblıkalyq forým ótedi.
— Búgingi qazaqstandyq mekteptiń mindeti — tek bilimdi shákirt tárbıeleý ǵana emes. Ol — rýhanı bıik, moraldyq qasıetteri ornyqqan, qoǵam ıgiligine adal qyzmet etýge daıyn jaýapty tulǵany — Adal Azamatty qalyptastyrý. Balalar jastaıynan eńbekti qadirleýdi, adaldyqty, ádilettilikti ári jaýapkershilikti boıyna sińirip ósedi. Bul qasıetter — elimizdiń jarqyn bolashaǵynyń berik irgetasy, — dedi mınıstr.
Onyń sózinshe, baǵdarlamanyń qundylyqtary oqý protsesine kiriktirilgen jáne pánderdiń mazmunynda, synyp saǵattarynda, synyptan tys is-sharalarda kórinis tapqan. Sondaı-aq mektepterde «Adal Azamat» qaǵıdattaryna negizdelgen biryńǵaı dızaın-kod kezeń-kezeńimen engizilip jatyr.
Óz kezeginde halyqaralyq sarapshylar qazaqstandyq tárbıe modelin joǵary baǵalady. Ulybrıtanııalyq professor Tom Harrıson Qazaqstan tájirıbesi ulttyq qundylyqtar men jahandyq úrdisterdi úılesimdi ushtastyratynyn atap ótti. Al sıngapýrlyq professor Lıao Shao Tszıýn dástúr men ınnovatsııany, ulttyq basymdyqtar men álemdik úzdik tájirıbelerdi qatar damytýǵa múmkindik beretin mundaı tásildiń strategııalyq mańyzyna basymdyq berdi.
Іs-shara qorytyndysy boıynsha Sıngapýr jáne Ulybrıtanııamen birlesip Halyqaralyq tárbıe jónindegi uıym qurý jumysy bastalatyn boldy.
— Búginde tárbıe máselesi álemdik deńgeıde asa ózekti taqyrypqa aınaldy. Qazaqstan óz ishinde júıeli qadamdar jasap qana qoımaı, tájirıbesin halyqaralyq qaýymdastyqpen bólisýge ázir. Al Halyqaralyq uıym qurý bastamasy jańa ǵylymı izdenister men ortaq jobalardyń damýyna jol ashady, — dep túıindedi sózin Ǵanı Beısembaev.
Esterińizge sala keteıik, «Adal Azamat» baǵdarlamasy «Birtutas tárbıe baǵdarlamasy» bastamasynyń jalǵasy bolyp tabylpdy. Onyń qaıta jańartylǵan mazmuny Memleket basshysynyń «Adal Azamat — Adal eńbek — Adal tabys» ıdeologııalyq tujyrymdamasyna negizdelgen. Bıylǵy 1 qyrkúıekten bastap baǵdarlama eldegi barlyq bilim berý uıymynda, sonyń ishinde jekemenshik mektepterde de engizilip jatyr.
Aıta ketelik Prezıdent «Adal azamat» baǵdarlamasyn pedagog mamandar daıarlaıtyn JOO-larda da engizýdi usyndy.