Toqaev Silk Way telearnasy janynan aımaqtyq telearna ashý týraly bastama kóterdi

Memleket basshysy Qasym-Jomart Toqaev Ortalyq Azııa jáne Ázerbaıjan memleketteri basshylarynyń VIIІ Konsýltatıvtik kezdesýinde dúrbeleńge toly dúnıede aımaqtaǵy beıbitshilik pen turaqtylyqty saqtaý basty mindet ekenin aıtty.

— Terrorızm, esirtki bıznesi, qarý-jaraq jáne adam saýdasy, zańsyz kóshi-qon, uıymdasqan qylmys pen alaıaqtyq qaýipsizdikke aıtarlyqtaı qater tóndiredi. Tsıfrlyq tehnologııalardyń qaskóılerdiń, atap aıtqanda, lańkester men esirtki satatyn qylmystyq toptardyń qolyna túsý qaýpi qatty alańdatady. Árıne, oǵan qarsy turatyn tásilderimiz zamanǵa saı bolýy kerek. Osy saladaǵy yntymaqtastyqty nyǵaıtýǵa Ortalyq Azııa elderi qaýipsizdik keńesi hatshylarynyń turaqty kezdesýleri aıtarlyqtaı úles qosýda. Úshinshi kezdesý 23-24 sáýir kúnderi Dýshanbede ótti. Byltyr Tashkentte qabyldanǵan Aımaqtyq qaýipsizdik jáne turaqtylyq tujyrymdamasyn, sondaı-aq Qaýipsizdik táýekelderi jáne onyń aldyn alý sharalarynyń tizbesin joǵary baǵalaımyz. Muny barlyq taraptyń múltiksiz oryndaýy mańyzdy, — dedi Prezıdent 

Qasym-Jomart Toqaev mádenı-gýmanıtarlyq qarym-qatynasty tereńdetýge basa nazar aýdardy. Prezıdent aımaq elderin baı tarıhı-mádenı mura biriktiretinin aıtty.

— Keıingi jyldary mádenı baılanystarymyz aıtarlyqtaı jandana tústi. Kórmeler, kınofestıvalder, forýmdar, eske alý keshteri ótkizilip jatyr. Jastardyń, joǵary oqý oryndarynyń jáne ǵylymı qaýymdastyqtyń arasyndaǵy qarym-qatynas, shyǵarmashylyq qaýymnyń tikeleı dıalogy arqyly osy úrdiske tyń serpin berý kerek. Biryńǵaı aqparattyq keńistikti qalyptastyrý yntymaqtastyǵymyzdy tereńdete túsedi. Qazaqstan otandyq Silk Way telearnasy janynan aımaqtyq telearna ashý týraly bastama kóterdi, — dedi Memleket basshysy.

Eske salaıyq, munyń aldynda Qasym-Jomart Toqaev Ortalyq Azııa men Ázerbaıjan saýdasyn $20 mlrd-qa jetkizýdi usynǵanyn jazdyq.