Qazaqstan sıyr, qoı etin jáne tiri maldy Iordanııaǵa eksporttaıdy
ASTANA. KAZINFORM – Aýyl sharýashylyǵy mınıstrliginde Qazaqstan Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń ókilderi men Iordanııa Hashımıt Koroldiginiń veterınarııalyq qyzmeti delegatsııasynyń kezdesýi ótti.
Kezdesýdiń negizgi taqyryby qazaqstandyq sıyr eti, qoı eti jáne tiri maldy Iordanııa naryǵyna eksporttaý máseleleri boldy. Qazaqstandyq tarap elimizdiń veterınarııalyq baqylaý júıesi, qadaǵalaý jáne sertıfıkattaý rásimderi, sondaı-aq otandyq ónimniń joǵary sapasy men qaýipsizdigin qamtamasyz etetin bıologııalyq qaýipsizdik sharalary týraly aqparat usyndy.
Kelissóz barysynda jáne taraptardyń veterınarııalyq qyzmetteri arasynda buǵan deıin júrgizilgen ózara árekettestiktiń nátıjesinde sıyr eti men qoı eti boıynsha mal sharýashylyǵy ónimderin eksporttaýǵa quqyǵy bar 6 qazaqstandyq kásiporynnyń Iordanııanyń resmı tizilimine engizilýine kelisim alyndy.
Anyqtama úshin:
•Batys Qazaqstan oblysy – «Batys-NYK» JShS, «Batys Marka Lamb» JShS
•Túrkistan oblysy – «Qaıyp ata» JShS, «Túrkistan et kombınaty» JShS
•Almaty qalasy – «Almaty Royal Food» JShS •Abaı oblysy – «Abaya meat processing factory»
JShS Iordanııalyq áriptestermen kelissózder veterınarııalyq sertıfıkattardy kelisý tártibin talqylaýǵa, sondaı-aq agroónerkásip salasyndaǵy saýda-ekonomıkalyq yntymaqtastyqty keńeıtý boıynsha aldaǵy qadamdardy aıqyndaýǵa múmkindik berdi.
Aıta keteıik, Qazaqstan jyl saıyn et ónimderin óndirý men eksport kólemin arttyryp keledi. 2024 jyly Qazaqstannan 30 myń tonnadan astam sıyr jáne qoı eti eksporttaldy, onyń ishinde Taıaý Shyǵys elderine de jóneltildi. Otandyq ónim Dúnıejúzilik janýarlar densaýlyǵy uıymy (WOAH) tarapynan rastalǵan halyqaralyq sapa jáne qaýipsizdik standarttaryna tolyq sáıkes keledi.
Aýyl sharýashylyǵy mınıstrligi kıik etiniń baǵasyn jarııalady.