Qazaqstan ShYU oqý-jattyǵýynda jańa tehnıkany tanystyrdy

BІShKEK. QazAqparat - Shanhaı yntymaqtastyq uıymynyń Qyrǵyzstanda ótip jatqan «Beıbit Mıssııa-2016» jattyǵýynda qazaqstandyq tarap Astanada shyǵarylǵan «Arlan» kóligi men ES-145 tikushaǵyn usyndy.

«Arlan» - mınaǵa qarsy kúsheıtilgen qorǵanyspen kóp qyrly brondalǵan dóńgelekti kólik. Onyń mınaǵa qarsy qorǵanysy joǵary. Kez kelgen qarýdan atqan oqty darytpaıdy. Salmaǵy 16 tonna, mashına ekıpajy - 2+8 adam, ol jyldamdyqty saǵatyna 120 shaqyrymǵa deıin arttyrady.

Sondaı-aq jattyǵýda jańa  Eurocopter EC-145 tikushaǵy tanystyryldy. Onyń artyqshylyǵy jaıly jýrnalısterge ekıpaj komandıri Alekseı Alıaev aıtyp berdi.

«Tikushaqtyń artyqshylyǵy - únemdiligi. Saǵatyna 200 lıtr otyn jumsaıdy. Ushý uzaqtyǵy - 715 shaqyrym. Bortta eki ushqyshtan basqa arnaıy maqsattaǵy jasaqtyń 8 jaraqtalǵan áskerin ornalastyrýǵa bolady. ES-145  álemdegi eń qaýipsiz tikushaqtardyń biri sanalady», - dedi A. Alıaev.

 «Tikushaqtardy qurastyrýmen Eurocopter Kazakhstan Engineering birlesken kásiporny aınalysady. Bul álemdegi eń zamanaýı ushaqtardyń biri, ol izdeý-qutqarý jumystaryn, basshylyq quramdy, desanttyq-kóliktik  tasymaldaýdy oryndaıdy», - dep qosty qazaqstandyq qorǵanys vedomstvosynyń ókili.

Eske salsaq, ShYU «Beıbit Mıssııa-2016»  jattyǵýy 15 qyrkúıekten beri Balyqshy (Qyrǵyzstan, Ystyqkól oblysy) qalasynyń mańyndaǵy «Edelveıs» áskerı polıgonynyń bazasynda ótip jatyr. Oǵan Qazaqstan, Reseı, Qytaı, Tájikstan, Qyrǵyzstan áskerı kúshteriniń bólimsheleri qatysýda.