Qazaqstan ShYU-nyń týrızmdi damytý kelisimine qosylady
«2022 jylǵy 16 qyrkúıekte Samarqandta jasalǵan Shanhaı yntymaqtastyq uıymyna múshe memleketterdiń úkimetteri arasyndaǵy týrızm salasyndaǵy yntymaqtastyqty damytý týraly kelisimge qosylsyn. Syrtqy ister mınıstrligi kelisimge QR Úkimetiniń qosylatyny týraly Shanhaı yntymaqtastyq uıymynyń hatshylyǵyn habardar etsin», - delingen Ashyq NQA portalynda jarııalanǵan Úkimet qaýlysynyń jobasynda.
Qujatqa qosymsha berilgen túsindirmede jazylǵandaı, atalǵan kelisimge qosylý týrızm salasyndaǵy yntymaqtastyqty keńeıtýge múmkindik bermek.
«Osy kelisimge qosylý Qazaqstan men Shanhaı yntymaqtastyq uıymyna múshe basqa da memleketterdiń arasyndaǵy týrızm salasyndaǵy yntymaqtastyqty keńeıtýge múmkindik beredi. Bul teris áleýmettik-ekonomıkalyq jáne quqyqtyq saldarǵa ákep soqpaıdy. Sondaı-aq, respýblıkalyq bıýdjetten qosymsha qarajat bólýdi talap etpeıdi. Qujat Qazaqstan Respýblıkasynyń múddeli memlekettik organdarymen kelisilgen», - dep jazylǵan qujatta.
Úkimet qaýlysy 1 shildege deıin kópshilik talqylaýda bolady. Keıin qol qoıý úshin Premer-Mınıstrge joldanady.
