Qazaqstan shynynda da qýatty memleket - Qyrǵyz eli baýyrlas kórshisin Táýelsizdik kúnimen quttyqtaýda
Qyrǵyz Respýblıkasynyń Jogorký Keӊeshiniń depýtaty, Qyrǵyz Respýblıkasyndaǵy qazaq dıasporasynyń jetekshisi Gúlshat Asylbaevanyń aıtýynsha, Qazaqstannyń áleýmettik-ekonomıkalyq jaǵdaıynyń turaqtylyǵy, qarjylyq jáne zańnamalyq salalardaǵy jetistigi Memleket basshysynyń bıik dárejedegi uıymdastyrýshylyq qabiletin kórsetedi.
«Qazirgi ýaqytta Qazaqstan álemdik qaýymdastyqtarmen demokratııalyq memleket retinde moıyndalǵan el. Nursultan Nazarbaev turaqtylyqty, ózara túsinistikti saqtap qalýǵa shaqyrady. Osy barlyq jetistikterdiń artynda Memleket basshysynyń asa aýqymdy ári kópqyrly jumysyn tanyp bilýge bolady», - deıdi ol.
Eldiń jetistikteri men táýelsiz Qazaqstannyń qalyptasýyndaǵy Elbasynyń rólin osy kúnderi Qyrǵyzstanda ótip jatqan túrli is-sharalar men konferentsııalarda saıasatkerler men sarapshylar erekshe atap ótip jatyr.
Qyrǵyz Respýblıkasy Syrtqy ister mınıstriniń birinshi orynbasary Dınara Kemelova óz sózinde Qazaqstan Respýblıkasy Prezıdentiniń basshylyǵymen ótken jyldar ishinde N. Nazarbaev úlken jetistikterge qol jetkizip, Qazaqstan aımaqtaǵy aldyńǵy qatarly memleketterdiń birine aınalǵanyn tilge tıek etti. Ol dostyq ári baýyrlastyq qarym-qatynastar, sondaı-aq eki el arasyndaǵy yntymaqtastyqtyń ary qaraı jalǵasatynyna senim bildirdi.
Kóptegen jergilikti BAQ-ta maqalalaryn bul kúnde Qazaqstanǵa arnap jatyr.
Atap aıtqanda, Qyrǵyzstandaǵy eń salmaqty ári kóne gazetterdiń biri «Qyrǵyz Týýsý» (1924 jyldan beri shyǵady) Qazaqstannyń qalyptasýy men damýyna arnalǵan maqala jarııalady. Onyń avtory, jýrnalıst Nazarbek Baıjigitov bylaı dep jazady:
«... Jetekshi ról - laıyqty túrde osy eldiń kóshbasshysy - Nursultan Nazarbaevqa tıesili. Saıası erik-jigersiz, ıntellektsiz jáne memlekettiń birinshi tulǵasynyń zor eńbeginsiz mundaı nátıjelerge jetý múmkin emes».
Kórshi Qazaqstannyń barlyq tabysyn tizbekteı kele avtor:
«Sońǵy eki onjyldyqta Qazaqstan halyqaralyq úrdisterde senimi berik, damyǵan jáne tereń ıntegratsııalanǵan memleketke aınaldy. Búgin de bul el álemge etnosaralyq tatýlyqtyń qandaı bolýy kerektigi ekenin tanytty. Bul, shynynda da qýatty ári ekonomıkalyq áleýeti zor, saıası turǵydan turaqty memleket. Memleket aımaqtyq ıntegratsııanyń moıyndalǵan lokomotıvine aınaldy. Osynyń arqasynda Qazaqstan sheteldik ınvestıtsııalardyń mıllıardtaǵan dollaryn tarta bildi», - deıdi.
Al Qyrǵyzstan halqy Assambleıasynyń ókili Zýhra Shıdakova Qazaqstan týraly oıymen bólise kele Táýelsizdiktiń mańyzdy jetistikteriniń biri - el ortalyǵyn Astanaǵa aýystyrý ekenin atap ótti:
«Men Astanadaǵy halyqaralyq konferentsııada bolǵanyma qýandym. Qala meni tań qaldyrdy. Astanany Almatydan Astanaǵa kóshirýdiń artynda jigerli sheshim men asa aýqymdy eńbek jatyr! Qala - álemdegi eń ádemi shaharlardyń biri. Búgin de Qazaqstan álemniń damyǵan 50 eliniń qataryna kiredi, bul Prezıdent pen onyń halqynyń úlken tabysy».
Qyrǵyz Respýblıkasy Joǵarǵy keńesiniń depýtaty Jánibek Bakchıev bolsa Qazaqstan halqyn Táýelsizdik kúnimen quttyqtaı otyryp, eki el arasyndaǵy erekshe jylýlyq pen tatý kórshilikti, baýyrlastyq qarym-qatynasty úlgi etti:
«Qazaqtar men qyrǵyzdar - baýyrlas halyq. Sondyqtan men sizdiń elińizdiń jetistikterine qýanyshtymyn. Qazaqstanǵa sáttilik tileımin».
Sonymen qatar Qazaqstan Respýblıkasynyń Táýelsizdigi kúnine arnap Qyrǵyzstan fýtbol federatsııasy arnaıy týrnır ótkizdi. Oǵan Qyrǵyzstan Parlamentiniń ókilderi, Qyrǵyzstanda jumys isteıtin birneshe qazaqstandyq kompanııalar, sondaı-aq Qazaqstan elshiliginen qyzmetkerler qatysty. 
Budan basqa Nursultan Nazarbaevtyń atynan Qazaqstan Respýblıkasynyń memlekettik merekesine oraı qyrǵyz sýretshisi Saparbaı Osmonalıevke «Qurmet» ordeni tapsyryldy. Sýretshige orden Qazaqstan men Qyrǵyzstan arasyndaǵy dostyq pen yntymaqtastyqty nyǵaıtýǵa qosqan úlesi úshin berilip otyr.
Avtor: Natalıa Gılt
