Qazaqstan Shveıtsarııaǵa óńdelgen ónim eksportyn arttyrmaq
ASTANA. KAZINFORM - 2026 jyldyń qańtarynan bastap, tamyz aıyna deıin Qazaqstan men Shveıtsarııa arasyndaǵy taýar aınalymy 1 120,9 mln AQSh dollaryn qurady. Bul ótken jylmen salystyrǵanda salystyrǵanda 19,3%-ǵa artyq.
Bul týraly Qazaqstan Respýblıkasynyń Saýda jáne ıntegratsııa mınıstri Arman Shaqqalıev Shveıtsarııa Konfederatsııasynyń Elshisi Krıstına Honegger hanymmen kezdesýinde málimdedi.
Atalmysh jıyn Mınıstrdiń Shveıtsarııa Konfederatsııasyna aldaǵy jumys sapary aıasynda ótti. 22-shi qazan kúni Bern qalasynda Saýda-ekonomıkalyq yntymaqtastyq jónindegi komıssııanyń 12-shi otyrysy ótpek. Taraptar ekijaqty saýda-ekonomıkalyq baılanystardy nyǵaıtý, sondaı-aq ózara saýda men ınvestıtsııalyq yntymaqtastyqty keńeıtý perspektıvalaryn talqylady.
Bıylǵy jyldyń 8 aıynyń ishinde Qazaqstannyń Shveıtsarııaǵa eksporty 15,4%-ǵa ósip, 820,5 mln dollarǵa jetti.
Mınıstrdiń sózinshe, Qazaqstan Shveıtsarııaǵa óńdelgen ónim eksportyn 30 pozıtsııa boıynsha arttyra alady. Sonyń ishinde eń perspektıvti baǵyttar - metallýrgııa, tamaq ónerkásibi, munaı-hımııa, mashına jasaý jáne hımııa salalary. Onyń ishinde alıýmınıı, bolat prokaty, ferroqorytpalar, kúnbaǵys maıy, un, makaron jáne kondıterlik ónimder týraly sóz qozǵaldy.
Óz kezeginde Shveıtsarııa Elshisi Krıstına Honegger Mınıstrdiń ustanymyn qoldap, shveıtsarııalyq taraptyń eki el arasyndaǵy saýda-ekonomıkalyq qatynastardy odan ári nyǵaıtýǵa nıetti ekenin bildirdi.
Aıta keteıik, Shveıtsarııa Qazaqstannyń eń iri ınvestorlarynyń biri: sońǵy 20 jylda ınvestıtsııa kólemi 36 mlrd dollardan asty. Búginde elimizde shveıtsarııalyq kapıtaly bar 400-ge jýyq kompanııa jumys jasaıdy.
Osyǵan deıin Qazaqstannyń sırek metaldardy óńdep, Eýropaǵa daıyn ónim eksporttaıtyny týraly jazdyq.
