Qazaqstan Shveıtsarııaǵa agroónimder eksportyn keńeıtýge múddeli

Qazaqstan tarapynan komıssııaǵa Saýda jáne ıntegratsııa mınıstri Arman Shaqqalıev, al Shveıtsarııa tarapynan Ekonomıka jónindegi memlekettik hatshylyqtyń (SECO) Ekijaqty ekonomıkalyq qatynastar basqarmasynyń basshysy, Federaldyq keńestiń saýda kelisimderi jónindegi delegaty, Elshi A. Raýber Zakser tóraǵalyq etti.

Otyrys barysynda taraptar Qazaqstan Respýblıkasy men Shveıtsarııa Konfederatsııasy arasyndaǵy saýda-ekonomıkalyq yntymaqtastyqtyń qazirgi jaǵdaıy men ony damytý perspektıvalaryn talqylady, sondaı-aq eki el taýarlar men qyzmetter saýdasyn odan ári arttyrýǵa múmkindik mol ekenin atap ótti.

Qazaqstan tarapy agroónerkásiptik keshen ónimderiniń, onyń ishinde bal men janýarlardan alynatyn ónimderdiń eksportyn keńeıtýge múddeli ekenin rastady. Osy mindetti iske asyrý maqsatynda Saýda jáne ıntegratsııa mınıstrligi «QazTrade» AQ-men birlesip, eksportqa baǵdarlanǵan otandyq kásiporyndardy irikteý jáne shveıtsarııalyq ımporttaýshylar men bólshek saýda jelileriniń talaptaryn eskere otyryp, nysanaly kommertsııalyq usynystar ázirleý boıynsha sharalar qabyldamaq.

Taraptar 2026 jylǵy 21 qazanda Tsıýrıh qalasynda Qazaqstannyń saýda-ekonomıkalyq mıssııasy aıasynda Switzerland Global Enterprise (S-GE) uıymy men Birlesken saýda palatasynyń (JCC) qoldaýymen uıymdastyrylǵan Qazaqstan-Shveıtsarııa bıznes-dóńgelek ústeliniń qorytyndylaryn oń baǵalady.

Investıtsııalyq yntymaqtastyq salasynda Qazaqstan tarapy ekonomıkanyń basym salalaryna, onyń ishinde arnaıy ekonomıkalyq aımaqtarǵa shveıtsarııalyq ınvestıtsııalardy, ozyq tehnologııalar men basqarýshylyq tájirıbeni tartýǵa múddeli ekenin aıtty.

Qazaqstan tarapy shveıtsarııalyq kompanııalardy ónerkásiptik kooperatsııaǵa jáne Qazaqstanda birlesken jobalardy iske asyrýǵa shaqyrdy. Basym baǵyttar qatarynda aýyl sharýashylyǵy ónimderin tereń óńdeý jáne zamanaýı agrotehnologııalardy engizý, sý resýrstaryn utymdy paıdalaný, jańartylatyn energetıka, kólik-logıstıka jáne kommýnaldyq ınfraqurylym, sondaı-aq tsıfrlyq tehnologııalar men jasandy ıntellekt ataldy.

Qazaqstan shveıtsarııalyq ınvestorlarǵa arnaıy ekonomıkalyq aımaqtardyń múmkindikterin usynýǵa jáne shveıtsarııalyq kompanııalardyń ónimderi men tehnologııalaryn Qazaqstan naryǵynda ilgeriletýge daıyndyǵyn bildirdi. Sonymen qatar shveıtsarııalyq tehnologııalyq kompanııalar, ınvestorlar, ýnıversıtetter men ǵylymı ortalyqtar erekshe quqyqtyq rejımi bar jańa «aqyldy» qala — Alatau City qalasyn damytýǵa qatysýǵa shaqyryldy. Atap aıtqanda, qalalyq tsıfrlyq ınfraqurylym, qarjylyq tehnologııalar jáne turaqty qalalyq sheshimder salalaryndaǵy yntymaqtastyqqa basymdyq berildi.

Shveıtsarııa tarapy mańyzdy shıkizat túrleri salasyndaǵy ekijaqty yntymaqtastyqty damytý, onyń ishinde tıisti ózara túsinistik týraly memorandýmǵa qol qoıý jóninde usynys jasady. Sondaı-aq Team Switzerland Infrastructure platformasy men Shveıtsarııanyń eksporttyq táýekelderdi saqtandyrý agenttiginiń (SERV) qoldaýymen shveıtsarııalyq kompanııalardyń Qazaqstandaǵy sý sharýashylyǵy jáne qaldyqtardy basqarý, kólik pen logıstıka, qoǵamdyq kólik jáne energetıka salalaryndaǵy ınfraqurylymdyq jobalarǵa qatysý múmkindikteri talqylandy.

Taraptar Qazaqstan Respýblıkasynyń Shveıtsarııa Konfederatsııasyndaǵy Elshiliginiń qoldaýymen Shaffhaýzen qalasynda Qazaqstan-Shveıtsarııa mádenı-iskerlik ortalyǵynyń ashylýyn quptady. Ortalyq eki el arasyndaǵy iskerlik jáne mádenı baılanystardy keńeıtýge arnalǵan alańǵa aınalmaq.

Budan bólek, veterınarııa jáne janýarlardan alynatyn ónimderdiń eki el naryǵyna qoljetimdiligin qamtamasyz etý, ǵylym jáne joǵary bilim, zııatkerlik menshikti qorǵaý, tsıfrlandyrý, kıberqaýipsizdik pen jasandy ıntellekt, sondaı-aq qylmystyq ister boıynsha quqyqtyq kómek kórsetý máseleleri qaraldy.

Otyrys qorytyndysy boıynsha Qazaqstan Respýblıkasynyń «Ulttyq ıadrolyq ortalyǵy» RMK men Shveıtsarııanyń radıoaktıvti qaldyqtardy kómý jónindegi ulttyq kooperatıvi (NAGRA) arasyndaǵy yntymaqtastyqty damytý jónindegi Jol kartasyna qol qoıyldy.

Kezdesý sońynda tıisti hattamaǵa qol qoıyldy. Taraptar ÚAK-tiń 13-otyrysyn Qazaqstan Respýblıkasynda ótkizý týrasynda ýaǵdalasty. Onyń merzimi men orny dıplomatııalyq arnalar arqyly kelisiletin bolady.