Qazaqstan shved bıznesimen áriptestikti keńeıtip, IKEA dúkenderin ashýǵa qyzyǵýshylyq tanytty
ASTANA. KAZINFORM – Qazaqstan men Shvetsııa saýda, ónerkásiptik kooperatsııa jáne jańa ınvestıtsııalyq jobalardy keńeıtý máselelerin talqylady.
Saýda jáne ıntegratsııa mınıstri Arman Shaqqalıev Shvetsııa Syrtqy ister mınıstrliginiń Saýda jónindegi memlekettik hatshysy Dıana ıAnsemen kezdesý ótkizdi.
Kelissózder barysynda taraptar saýda-ekonomıkalyq yntymaqtastyqtyń ózekti máselelerin, ózara taýar aınalymyn ulǵaıtý, ınvestıtsııalar tartý jáne eki eldiń iskerlik toptary arasyndaǵy ózara is-qımyldy keńeıtý perspektıvalaryn qarastyrdy.
Saýdany damytýǵa járdemdesý máselelerine erekshe nazar aýdaryldy. Atap aıtqanda, Qazaqstan men Shvetsııa naryqtaryna ónimderdiń qoljetimdiligin jeńildetý, tehnıkalyq kedergilerdi joıý, logıstıkalyq jáne kedendik rásimderdi jetildirý, sondaı-aq eksporttyq-ımporttyq operatsııalardy damytý úshin qolaıly jaǵdaılar jasaý máseleleri talqylandy.
Qazaqstan tarapy otandyq shıkizattyq emes ónimderdiń Shvetsııa jáne Eýropalyq Odaq naryqtaryna eksportyn keńeıtýge múddeli ekenin rastady. Osyǵan baılanysty eksporttaýshylardy qoldaý jáne tikeleı iskerlik baılanystardy damytý maqsatynda QazTrade, Shvetsııanyń Ulttyq saýda keńesi jáne Business Sweden uıymdary arasyndaǵy yntymaqtastyqty tereńdetý múmkindikteri qarastyryldy.
Kezdesýge qatysýshylar ónerkásiptik kooperatsııa máselelerine de erekshe nazar aýdardy. Taraptar Hyundai Trans Almaty men Volvo Group arasyndaǵy yntymaqtastyq týraly memorandýmǵa qol qoıylýyn quptady. Jobany iske asyrý otandyq mashına jasaý salasyn damytýǵa, jańa óndiristik qýattardy qurýǵa, ınvestıtsııalar tartýǵa jáne Qazaqstannyń eksporttyq áleýetin nyǵaıtýǵa yqpal etedi dep kútilýde.
Kelissózder barysynda shved bıznesiniń Qazaqstan naryǵyndaǵy qatysýyn keńeıtý perspektıvalary da qarastyryldy. Qazaqstan jetekshi shved kompanııalarymen yntymaqtastyqty damytýǵa, sonyń ishinde elimizde IKEA dúkenderin ashý múmkindigine qyzyǵýshylyq bildirdi.
Taraptar birlesken jobalardy ilgeriletý jáne bıznestiń ózekti máselelerin sheshý úshin tıimdi alańǵa aınalatyn Qazaqstan–Shvetsııa saýda-ekonomıkalyq jáne ınvestıtsııalyq yntymaqtastyq jónindegi komıssııany qurýdyń mańyzdylyǵyn atap ótti.
Kezdesý qorytyndysy boıynsha Qazaqstan men Shvetsııanyń saýda-ekonomıkalyq áriptestikti odan ári nyǵaıtýǵa, ınvestıtsııalyq ózara is-qımyldy keńeıtýge jáne jańa birlesken bastamalardy júzege asyrýǵa ózara múddeliligi rastaldy.
Aıta ketelik Qazaqstan men Shvetsııa saýda-ekonomıkalyq komıssııa qurǵan edi.
