«Qazaqstan» shokoladynda Týdy beıneleý qanshalyqty zańdy

ASTANA. KAZINFORM – Astana qalasy Tilderdi damytý jáne arhıv isi basqarmasynyń basshysy Sáken Esirkep «Qazaqstan» shokoladynda memlekettik Týdy beıneleý qanshalyqty zańdy ekenin aıtyp berdi.

− «Qazaqstan» shokoladynyń bolǵany durys dep oılaımyn. Óıtkeni bul da Qazaqstannyń bir sımvoly ǵoı. Bul jerde mynany túsinýimiz kerek, Memlekettik Týdyń óz standarttary bar, onyń ornamenti bar, oıýdan keıin qansha santımetrden keıin kún ornalasýy kerek, kúnniń aınalasyndaǵy árbir shýaqtyń sany bar, túsi bar. Al eger onyń qandaı da bir elementi, ornamenti bolmasa, ol Tý bolyp eseptelmeıdi. Shokoladta da «Qazaqstan» dep jazylǵan, sosyn kún salynǵan, kók túste bolǵan soń, Tý sııaqty kórinedi. Bul patrıottyq sezimdi týdyratyn ádemi dúnıe, biraq tolyqqandy Tý bolyp eseptelmeıdi, − dedi Sáken Esirkep tilshilerge bergen suhbatynda.

Aıta keteıik, elordada eriktiler turǵyndarǵa memlekettik rámizder týraly vıktorınalyq suraqtar qoıyp, estelik syılyqtar tabystady. Kópqabatty úıler terezesine 300-ge jýyq Tý ilindi. Sondaı-aq, úsh myń Rýbık tekshelerinen alyp Tý beınesi jasaldy. Al búgin keshke Báıterek monýmenti mańynda «Dombyra party» ótedi.

− Ózderińiz bilesizder, buǵan deıin rámizderimizge qatysty talaptar qatańdaý bolatyn. Kez kelgen azamat týdy óz balkonyna ilgende máseleler týyndaıtyn. Biraq sońǵy eki jylda Memleket basshysy memlekettik Týdy, rámizderdi keńinen paıdalaný kerek, el azamattarynyń patrıottyq sezimin erkin bildirýine múmkindik syılaý kerek degen bolatyn. Búgin qalamyzdyń iri dańǵyldary men kóshelerinde úı qasbetteri men balkondaryna Memlekettik Tý ilinip jatyr. Qala kóshelerine 1,5 myń kók jalaýsha ilindi. Sondyqtan, árqashan Týymyz tórimizde bolsyn, úıimizde, júrgen jerimizde týymyzdy nasıhattap, kóterip júreıik, − dedi S. Esirkep.

Buǵan deıin Qazaqstan rámizderin qorlaǵandarǵa qandaı jaza qoldanylatynyn habarlaǵan edik. Memlekettik rámizderdi orynsyz paıdalanǵandar Ákimshilik quqyq buzý týraly kodeks boıynsha, al qorlaǵandar – Qylmystyq kodeks boıynsha jaýapkershilikke tartylady.

Sonymen birge, Astanada 3 myń Rýbık kýbıginen Eltańba beınesi qurastyryldy.

Memlekettik rámizderi kúni Astanada 500-ge jýyq is-shara ótedi.