Qazaqstan ishki jalpy ónimniń qansha paıyzyn qorǵanysqa jumsaıdy

ASTANA. KAZINFORM – Qorǵanys mınıstrligi Kazinform saýalyna joldaǵan jaýabynda áskerı tehnıka jóndeıtin bólimderdiń sanyn arttyrý josparda bar ekenin málim etti.

«Áskerı tehnıkany jóndeý múmkindikterin arttyrý úshin Qarýly kúshter qurylymynan jóndeý-qalpyna keltirý jumysyna mamandanǵan bes jańa bólim (Almaty, Aqtaý, Temirtaý, Qonaev jáne Gvardeısk qalasynda) jasaqtalyp jatyr. Búgingi tańda Qarýly kúshterimiz qarý-jaraqtyń, áskerı tehnıkanyń jáne ózge de materıaldyq resýrstardyń negizgi túrlerimen qamtamasyz etilgen. Bul qazirgi syn-qater men memleket qaýipsizdigine tónýi múmkin qaýipke barynsha ratsıonaldy jaýap berýge múmkindik jasaıdy» dep jazady mınıstrlikten. 

Mınıstrlik málimetinde eldiń qorǵanys salasyna bólinetin aqshanyń kólemi de aıtylǵan.

«Ulttyq jáne óńirlik qaýipsizdikti nyǵaıtý múddesinde basqa memlekettermen áskerı jáne áskerı-tehnıkalyq yntymaqtastyq aıasy keńeıip keledi. Qorǵanys mınıstrligi Indýstrııa jáne qurylys mınıstrligimen birlesip, sondaı-aq áskerı-ónerkásip kesheni kásiporyndarynyń basshylaryn tarta otyryp, qarý-jaraq pen áskerı tehnıkany satyp alýdy memlekettiń áskerı-ekonomıkalyq qaýipsizdigi men áskerı ónimdi jetkizýdiń jańa naryqtaryn izdeý qajettigin eskere otyryp, ártaraptandyrý baǵytynda júıeli jumys júrgizip jatyr. Qoldanystaǵy qarý-jaraq pen áskerı tehnıka parkin tehnıkalyq turǵydan qamtamasyz etý jáne jóndeý, zamanaýı qarý-jaraq pen áskerı tehnıkanyń, oq-dári óndirisin damytý jáne oqshaýlaý máselesi pysyqtalyp jatyr. Memlekettik qorǵanys tapsyrysyn eskere otyryp, qorǵanys shyǵynyn qarjylandyrýǵa JІÓ-niń shamamen 1 paıyzy jumsalady» dep jazylǵan mınıstrlik jaýabynda.