Qazaqstan ShYU jáne BUU arasyndaǵy yntymaqtastyqty keńeıtýdi ilgeriletýde
NAIROBI. KAZINFORM – 28 aqpanda Naırobı qalasynda (Kenııa) BUU Qorshaǵan orta jónindegi assambleıasynyń 6-shy sessııasy aıasynda Qazaqstannyń Shanhaı yntymaqtastyq uıymyndaǵy tóraǵalyǵymen ShYU-BUU joǵary deńgeıdegi «Bir planeta, bir bolashaq: ekologııalyq turaqtylyq úshin kúshterdi biriktirý» arnaıy is-sharasy ótti.
Іs-sharaǵa ShYU-ǵa múshe memleketterdiń qorshaǵan ortany qorǵaý máselelerine jaýapty mınıstrlikteri men vedomstvolary basshylary qatysyp, jahandyq ekologııalyq jáne klımattyq problemalar jáne olardy ShYU men BUU áleýetin paıdalana otyryp sheshý joldary týraly pikir almasty.
Arnaıy is-sharanyń qorytyndysy boıynsha yntymaqtastyqty ornatý maqsatynda ShYU Bas hatshysy Chjan Mın jáne BUU Qorshaǵan ortany qorǵaý baǵdarlamasynyń atqarýshy dırektory Inger Andersen ShYU men ıÝNEP hatshylyqtary arasynda ózara túsinistik týraly memorandýmǵa qol qoıý rásimi ótti.
Qujat bıologııalyq ártúrlilikti saqtaý, tabıǵı apattarmen kúresý, klımattyń ózgerýine beıimdelý, ǵylymı-tehnıkalyq yntymaqtastyq, qorshaǵan ortanyń lastanýyn azaıtý, turaqty damýǵa járdemdesý jáne ekologııalyq týrızmdi ilgeriletý máselelerinde eki uıym arasyndaǵy yntymaqtastyqty damytýdy kózdeıdi.
Іs-shara Qazaqstan jarııalaǵan «2024 jyl – ShYU ekologııa jyly» bastamasy aıasynda ótti.
