Qazaqstan ShYU tóraǵasy retinde barlyq maqsat-mindetti tolyǵymen oryndady

ASTANA. KAZINFORM – Qazaqstan ShYU tóraǵasy retinde aldyńǵy sammıtte aıtylǵan barlyq maqsat-mindetti tolyǵymen oryndady. Bul týraly elordada ótip jatqan ShYU sammıtinde Memleket basshysy Qasym-Jomart Toqaev aıtty.

Prezıdent Qazaqstan tóraǵalyǵy kezinde mádenı-gýmanıtarlyq baılanystardy nyǵaıtýǵa erekshe nazar aýdarylǵanyn aıtty.

«ShYU formatyn» barynsha tartymdy etetin birqatar mańyzdy joba iske qosyldy. Olardyń qatarynda «ShYU elderiniń rýhanı kıeli oryndary» jobasy men «ShYU Jibek joly» birinshi halyqaralyq mýzyka festıvali bar. Sondaı-aq birlesken jobalardy júzege asyrý úshin 10 týrıstik aýmaq anyqtaldy. Almaty qalasy ShYU-nyń mádenı jáne týrıstik astanasyna aınaldy, – dedi Memleket basshysy.

Qasym-Jomart Toqaevtyń aıtýynsha, Qazaqstan ShYU tóraǵasy retinde aldyńǵy sammıtte aıtylǵan barlyq maqsat-mindetti tolyǵymen oryndady. Sondaı-aq Prezıdent elimizdiń bastamalaryn júzege asyrýǵa qoldaý kórsetip, belsendi atsalysqany úshin barlyq memleketke shynaıy rızashylyǵyn bildirdi.

Aıta keteıik, elordadaǵy Táýelsizdik saraıynda Qazaqstan tóraǵalyǵymen Shanhaı yntymaqtastyq uıymynyń sammıti bastaldy.

Qazaqstan Prezıdenti Qasym-Jomart Toqaev ShYU sammıtine kelgen mártebeli meımandardy qarsy alyp, qol alysty. El basshylaryn qarsy alý rásimi aıaqtaldy.

Belarýs ShYU-nyń tolyqqandy múshesi boldy. Shanhaı yntymaqtastyq uıymynyń sammıtinde múshe memleketterdiń basshylary Belarýs Respýblıkasyn Uıym múshelegine qabyldaýǵa qatysty birqatar qujatqa qol qoıdy.

Shanhaı yntymaqtastyq uıymy halyqaralyq qatynas júıesiniń mańyzdy tetigine aınaldy. Bul týraly sammıtte Memleket basshysy Qasym-Jomart Toqaev aıtty.