Qazaqstan ShYU-nyń halyqaralyq arenadaǵy bedelin nyǵaıtýǵa kúsh saldy – sarapshy
ASTANA. KAZINFORM - Qazaqstan qoǵamdyq damý ınstıtýtynyń sarapshysy, aımaqtanýshy Erkebulan Qýanbaı Shanhaı yntymaqtastyq uıymynyń sammıtinde Belarýstiń uıymnyń tolyqqandy múshesi bolýyna qatysty pikir aıtty.
«Jalpy, ShYU-ǵa múshe elderdiń basym kópshiligin halyqaralyq qatynastarda «jahandyq ońtústik» dep atalady, ıaǵnı kóbinese shyǵys memleketter kiredi. Keıingi kezde uıymǵa Úndistan, Pákistan, Iran qosylsa, bıyl Belarýs múshe atanyp jatyr. Sondyqtan osy elderdiń qosylýy, bir uıymnyń astynda birigýi álemdik arenada olarǵa ózderiniń ustanymyn jarııalaýǵa kómektesedi. Búgingi sammıtte Astana deklaratsııasy talqylanyp jatyr jáne bul qujat qabyldanady degen úmittemiz. Sol deklaratsııanyń aıasynda múshe elderdiń biraýyzdan maquldanǵan úndeýi aıqyn kórinedi», - dedi E.Qýanbaı Kazinform agenttigine bergen suhbatynda.
Sarapshynyń aıtýynsha, bul sammıttiń jalpy erekshiligi – múshe elderden bólek, basqa da memleketterdiń qatysýynda.
«ShYU-daǵy Qazaqstannyń tóraǵalyǵy Qytaıǵa ótip jatyr. Bul jerde Qazaqstannyń róline toqtalsaq, osy uıymnyń halyqaralyq arenadaǵy bedelin kóterý jáne halyqaralyq uıymdarmen tyǵyz yntymaqtastyqty nyǵaıtý. Máselen, osyǵan deıin ShYU dıalog alańy retinde boldy. Memleket basshysy byltyrdan beri uıym aıasynda Investıtsııalyq qor qurýdy usynyp keledi. Osy qordy qurý júzege asady degen oıdamyn. Sebebi osy baǵytta ınfraqurylym jobalaryn qarjylandyrý iske asady. Atap aıtqanda, mundaı mańyzdy qadamdar ShYU aıasynda qabyldanatyn sheshimder naqty ekonomıkalyq joba kúıinde júzege asýy múmkin ekenin kórsetedi», - dedi Erkebulan Qýanbaı.
Sonymen qatar ol Shanhaı yntymaqtastyq uıymynyń sammıti aıasynda Astanaǵa BUU Bas hatshysy Antonıý Gýterrıshtiń kelýine oraı pikirin aıtty.
«Antonıý Gýterrıshtiń kelýi Shanhaı yntymaqtastyq uıymynyń bedelin jáne BUU ustanymyn baıqatyp otyr. Óıtkeni álemdegi qaqtyǵystardy sheshý qıyndyǵyna baılanysty BUU-ǵa qatysty syn kóbeıip ketti. Sondyqtan BUU ókilderiniń Astanaǵa kelip, osy óńirdiń pikirin bilgisi keledi», - dedi sarapshy.
Eske salsaq, byltyr shilde aıynda Prezıdent Qasym-Jomart Toqaev Shanhaı yntymaqtastyǵy uıymyna múshe elderdiń Investıtsııalyq qoryn qurý múmkindigin qarastyrýdy usyndy.
