Qazaqstan ShYU-ny jańa qaýip-qaterlerge beıimdeýdi usyndy
ASTANA. KAZINFORM - Qazaqstan Respýblıkasy Syrtqy ister mınıstri Ermek Kósherbaev Shanhaı yntymaqtastyq uıymyna múshe memleketterdiń Syrtqy ister mınıstrleri keńesiniń kezekti otyrysyna qatysty, dep habarlaıdy mınıstrliktiń baspasóz qyzmeti.
Delegatsııa basshylary qazirgi halyqaralyq ahýal jaǵdaıynda ShYU-ǵa múshe memleketterdiń syrtqy saıası úılestirýin odan ári tereńdetý máseleleri boıynsha pikir almasty, sondaı-aq 2026 jylǵy 1 qyrkúıekte Bishkek qalasynda ótetin aldaǵy ShYU sammıtine daıyndyq barysyn talqylady.
E.Kósherbaev óz sózinde óńirlik qaýipsizdikti nyǵaıtý men kópsalaly yntymaqtastyqty damytýdaǵy ShYU-nyń erekshe rólin atap ótip, Qazaqstannyń Uıym qyzmetin qoldaýdy ózgerissiz jalǵastyratynyn rastady.
Qazaqstannyń syrtqy saıası vedomstvosynyń basshysy ShYU-ny odan ári jetildirý jáne onyń ınstıtýttaryn qazirgi zamanǵy syn-qaterler men qaýipterge beıimdeý qajettiligine erekshe nazar aýdardy.
QR Syrtqy ister mınıstri halyqaralyq ahýaldyń qarqyndy ózgerýi jaǵdaıynda jahandyq ekonomıkanyń ornyqtylyǵy men halyqaralyq saýdanyń qaýipsizdigin qamtamasyz etý máseleleri erekshe ózekti bolyp otyrǵanyn atap ótti.
-Áskerı sıpatqa ulasyp otyrǵan geosaıası turaqsyzdyq saýda qatynastarynyń ornyqtylyǵyna eleýli áser etip otyr. Búginde jetkizý tizbekteriniń qaýipsizdigin qamtamasyz etý máselesi, onyń ishinde Qazaqstan úshin de, barǵan saıyn ózekti bola túsýde. Buǵan energetıkalyq ınfraqurylymǵa jáne Qazaqstan munaıyn tasymaldaý úshin jalǵa alynǵan tankerlerge belgisiz ushqyshsyz júıelerdiń shabýyldary dálel. Osyndaı jaǵdaıda saýda baǵyttarynyń qaýipsizdigin qamtamasyz etý jónindegi birlesken kúsh-jigerdiń mańyzy arta túsedi, – dedi E.Kósherbaev.
Buǵan deıin málimdelgendeı, Qazaqstan zańdy halyqaralyq saýdany, jahandyq energetıkalyq naryqtardy jáne halyqaralyq kólik-logıstıkalyq jetkizý tizbekteriniń qaýipsizdigin turaqsyzdandyrýǵa baǵyttalǵan kez kelgen áreketterdi múldem jol berýge bolmaıtyn is-áreket retinde qarastyrady.
QR mınıstri yntymaqtastyqtyń basym baǵyttarynyń biri retinde klımattyń ózgerýine beıimdelý jáne sý resýrstaryn utymdy paıdalaný salalaryndaǵy birlesken jumysty jandandyrý qajettigin atap ótti. Osyǵan baılanysty Qazaqstan BUU aıasynda Halyqaralyq sý uıymyn jáne ShYU-nyń Sý problemalaryn taldaý ortalyǵyn qurý jónindegi bastamalarǵa múshe memleketterdiń qoldaý bildiretinine senim bildirdi.
Otyrys qorytyndysy boıynsha ShYU-nyń tıimdiligin arttyrýǵa baǵyttalǵan negizgi qujattardyń jobalary, onyń ishinde ShYU-nyń 25 jyldyǵyna arnalǵan Bishkek deklaratsııasy maquldandy.
Іs-shara aıasynda ShYU-ǵa múshe memleketterdiń syrtqy ister mınıstrleriniń Qyrǵyz Respýblıkasynyń Prezıdenti Sadyr Japarovpen ujymdyq kezdesýi ótti.
Kezdesý barysynda ShYU sheńberindegi kópsalaly yntymaqtastyqty odan ári keńeıtýdiń, sondaı-aq Uıymǵa múshe memleketter halyqtarynyń ál-aýqatyn arttyrýǵa baǵyttalǵan birlesken bastamalardy iske asyrýdyń mańyzdylyǵy atalyp ótti.
QR Syrtqy ister mınıstri E.Kósherbaev Qyrǵyz Respýblıkasynyń ShYU-ǵa tóraǵalyǵyn odan ári qoldaýǵa daıyn ekenin bildirip, Qazaqstannyń Shanhaı yntymaqtastyq uıymyna múshe memlekettermen ózara tıimdi ári syndarly yntymaqtastyqty odan ári damytýǵa beıildigin rastady.
Osyǵan deıin Qazaqstan ShYU elderi arasynda mádenıet salasyn tsıfrlyq baǵytta damytýdy usynǵan bolatyn.
