Qazaqstan ShYU Damý bankiniń shtab-páterin ornalastyrýǵa daıyn — Prezıdent
BІShKEK. KAZINFORM — Qasym-Jomart Toqaevtyń paıymdaýynsha, saýda-ekonomıkalyq jáne ınvestıtsııalyq seriktestik aıasyn keńeıtýdiń strategııalyq máni zor. Bul týraly Aqordanyń baspasóz qyzmeti habarlady.
Memleket basshysy kúsh-jiger jumyldyrý nátıjesinde ShYU elderiniń ózara taýar aınalymy bir trıllıon dollarǵa taıap qalǵanyna nazar aýdardy.
— Alaıda, bizdiń pikirimizshe, ekonomıkalyq baılanys múmkindikterin áli tolyq paıdalana almaı otyrmyz. ShYU-ǵa múshe memleketterdiń resýrstyq, óndiristik jáne tehnologııalyq áleýetin barynsha paıdalanyp, jańa ósim baǵyttary men ornyqty iskerlik baılanystardy túzý mańyzdy. Qazaqstan ShYU-nyń keń aýqymdy saýda-ınvestıtsııalyq keńistigi qalyptasqanyn qalaıdy. Kedergileri meılinshe az, tsıfrlyq protsedýralar men kólik-logıstıkalyq baılanystary damyǵan orta quryp, ýaǵdalastyqtardan naqty bastamalarǵa kóshý kerek dep sanaımyz. Pılottyq joba retinde ındýstrııalyq konsortsıýmdar tetigin engizýdi usynamyz. Bul memleketterge basqa qatysýshylardy kútpeı-aq, pisip-jetilgen jobalardy júzege asyrýǵa múmkindik beredi. Keıin tabysty bastamalardy tutas Uıym aýmaǵynda jappaı taratýǵa bolady, — dedi Memleket basshysy.
Prezıdent qazirgi shekara mańyndaǵy yntymaqtastyq ortalyqtarynyń bazasynda ShYU transshekaralyq saýda aımaqtaryn iske qosýǵa bolady dep sanaıdy.
— Osy arqyly taýar almasýdyń ońtaılanǵan tásilin, tsıfrlyq rásimderdi jáne zamanaýı esep aıyrysý tetikterin synap kórýge bolady. Taǵy bir basym baǵyt — tolyqqandy ınvestıtsııalyq kontýr qalyptastyrý. Qazaqstan Qytaıdyń ShYU Damý bankin qurý týraly bastamasyn qoldaıdy. Qarjy uıymynyń resýrsyn, eń aldymen, ınfraqurylymdyq, tehnologııalyq jáne ónerkásip jobalaryna baǵyttaǵan jón. Múshe memleketterdiń ortaq uıǵarymy bolǵan jaǵdaıda, Qazaqstan atalǵan ınstıtýtty, onyń shtab-páterin óz aýmaǵynda ornalastyrýǵa daıyn, — dedi Qasym-Jomart Toqaev.
Aıta ketelik Toqaev ShYU múshe memleketter basshylary keńesiniń otyrysyna qatysty.
