«Qazaqstan» shıpajaıynyń burynǵy basshysy ustaldy
Sońǵy ýaqytta áleýmettik jelilerde jáne keıbir BAQ-tarda tergeýge qysym kórsetý maqsatynda «Sanatorıı Qazaqstan» AQ-nyń burynǵy prezıdenti Q. Sultanǵa qatysty qylmystyq is týraly túrli jalǵan jáne boljamdy aqparattar jarııalanýda. Osyǵan baılanysty ІІM Tergeý departamenti Q. Sultanǵa jáne basqa da adamdarǵa qatysty sotqa deıingi tergeý júrgiziletinin habarlaıdy. Oǵan QR Qylmystyq kodeksiniń 189-baby 4-bóligi (senip tapsyrylǵan bóten múlikti asa iri mólsherde ıemdený nemese ysyrap etý) boıynsha aıyp taǵyldy. Q. Sultan 2013 jyly shıpajaı ǵımaratyn qaıta jańartý jáne kúrdeli jóndeýge degen jeleýmen bankke joǵary kiristilik týraly jalǵan málimet berip, 2,6 mlrd teńge nesıe alǵan. Q. Sultan odan ári ártúrli qarjylyq shemalardy paıdalana otyryp, «jalǵan kásiporyn» arqyly aqsha qarajatyn qolma-qol aqshaǵa aınaldyryp, 974 mln teńge jymqyrdy. Sonymen qatar AQ-nyń burynǵy basshysy óziniń tanystary men jaqyn týystaryn aqsha qarajatyn jymqyrý shemasyna tartqan. 2015 jyldan bastap 2019 jylǵa deıin qoǵamnyń sporttyq-saýyqtyrý keshenin Q. Sultannyń kishi qyzy A. Beısebaeva basqarǵan, ol barlyq kiristerdi ózi ıemdegen. Bul jáne basqa da talan-tarajǵa salý faktileri aýdıtorlyq tekseriste, sot-ekonomıkalyq saraptamada jáne sanatorıı qyzmetkerleriniń kórsetýlerinde rastaldy. Búgingi kúni AQ is júzinde bankrottyqqa deıin jetken. Qarjy mekemesi aldyndaǵy bereshektiń jalpy somasy 3,5 mlrd teńgeden asady. Qazirgi ýaqytta Q. Sultan sottyń sanktsııasymen qamaýǵa alyndy, onyń qyzy A. Beısebaevaǵa qatysty úıqamaqqa alý sharasy qabyldandy. Sonymen qatar, qylmystyq jaýapkershilikke qoǵamnyń birqatar qyzmetkerleri men K. Sultannyń jaqyn týystary tartylady.
Tergeý jalǵasyp jatyr.