Qazaqstan shıkizattyq emes taýar eksportyn 22 paıyzǵa ósirdi

ASTANA. QazAqparat - Syrtqy saýda aınalymynda 25,1 paıyz deńgeıinde ósim boldy. Bul týraly 2017 jylǵy áleýmettik-ekonomıkalyq damýǵa arnalǵan baspasóz máslıhatynda QR Ulttyq ekonomıka vıtse-mınıstri Baýyrjan Bekeshev málim etti, dep habarlaıdy QazAqparat.

«2017 jyly barlyq mańyzdy kórsetkishter boıynsha Qazaqstannyń syrtqy saýdasynda oń qarqyn oryn aldy. Biz 2016 jylmen salystyrǵanda syrtqy saýda aınalymyndaǵy 25,1 paıyz deńgeıindegi edáýir ósimdi baıqap otyrmyz. 2017 jylǵy aqshalaı mándegi kórsetkish 69,5 mlrd AQSh dollaryna jetti. 2016 jyly bul kórsetkish 55,5 mlrd dollaryn quraǵan bolatyn», - dedi B. Bekeshev Ortalyq kommýnıkatsııalar qyzmetinde.

Osy oraıda ol 2017 jyly elimizdiń syrtqy saýda qurylymy aıtarlyqtaı ózgergendigin atap kórsetti. Eksport qurylymynda shıkizattyq emes ónimniń úlesi artyp keledi.

«Qazaqstan eksportynyń jalpy kólemi 31,6 paıyzǵa ósti jáne 43,1 mlrd AQSh dollaryn qurady (2016 jyly 32,7 mlrd AQSh dollary). Shıkizattyq emes taýarlardyń úlesi aıtarlyqtaı ulǵaıdy, bul kórsetkish boıynsha ósim 22,1 paıyzǵa jetti. Qazaqstan 14 mlrd AQSh dollarynan astam somaǵa  shıkizatsyz ónimdi eksporttady», - dedi Bekeshev.

Onyń atap ótýinshe, EAEO alańyn qoldaný ózara tıimdi saýdalyq ýaǵdalastyqtardyń esebinen úshinshi elderdiń naryǵyna qol jetkizýdi keńeıtýge múmkindik beredi.

«Máselen, Vetnamǵa eksportty alsaq, onymen erkin saýda týraly kelisim 2015 jyly jasalǵan bolatyn. 2017 jyly bul kelisim iske qosylyp, eksport 20 eseden astam ósti jáne 274,2 mln AQSh dollaryna jetti. Sondaı-aq búgingi kúni biz Iranmen erkin saýda týraly jáne QHR-men saýda-ekonomıkalyq yntymaqtastyq týraly kelisimder boıynsha kelissózderdi aıaqtadyq. Bul bolashaqta atalǵan eldermen saýda kólemin arttyrýǵa múmkindik beredi», - dedi B.Bekeshev.