Qazaqstan shetelge eksporttaıtyn spýtnıkter qashan ushyrylady

ASTANA. KAZINFORM — QR Jasandy ıntellekt jáne tsıfrlyq damý mınıstrligi jaýap berdi Mońǵolııa, Nıgerııa jáne Kongoǵa spýtnıkterdi eksporttaý jumysyna túsinik berdi.

— Qazaqstan jerdi qashyqtyqtan zondtaý (JQZ) spýtnıkterin eksporttaý baǵytyn belsendi túrde damytyp, halyqaralyq naryqqa shyǵýdyń naqty kezeńine ótti. Búginde Mońǵolııa, Kongo Respýblıkasy jáne Nıgerııamen JQZ spýtnıkterin ázirleý jáne jetkizý boıynsha kelisimder jasalǵan. Bul kelisimder Qazaqstannyń spýtnık jasaýdyń tolyq tsıklin jobalaý, óndirý, synaqtan ótkizý jáne iske qosýǵa deıingi protsesterdi meńgergenin kórsetedi, — delingen mınıstrliktiń Kazinform agenttigine bergen jaýabynda.

Atap aıtqanda, eksporttyq jobalar aıasynda sheteldik tapsyrys berýshiler úshin úsh spýtnık daıyndalady.

— Olardy ushyrý 2028–2029 jyldarǵa josparlanǵan. Qazirgi ýaqytta tıisti ınjenerlik jáne óndiristik jumystar júrip jatyr. Bul jobalar Qazaqstannyń ǵarysh salasyn kommertsııalandyrýǵa, eksporttyq áleýetin arttyrýǵa jáne halyqaralyq tehnologııalyq áriptestikti nyǵaıtýǵa múmkindik beredi, — dep atap ótilgen vedomstvo aqparatynda.
Budan buryn habarlanǵandaı, bıyl naýryz aıynda Qazaqstan Mońǵolııa, Nıgerııa jáne Kongoǵa qandaı spýtnık eksporttaıtynyn jazǵan edik. 

2025 jyly Kongomen jáne Nıgerııamen eksporttyq kelisimshart jasaldy.