Qazaqstan sheteldik avıaotynǵa táýeldi me — mınıstrlik jaýaby
ASTANA. KAZINFORM — Áýe kompanııalarynyń otynǵa degen qajettiligi tolyq qamtamasyz etilgenine qaramastan, Qazaqstan avıaotyndy tórt elden ımporttaýdy jalǵastyryp otyr. Kazinform tilshisi bul jetkizilimder qalaı júzege asyrylatynyn jáne olardyń ne úshin qajet ekenin anyqtap kórdi.
Taıaý Shyǵystaǵy qaqtyǵystyń ýshyǵýy kezinde Ormýz buǵazy arqyly munaı jetkizýdegi irkilister aıasynda birqatar sheteldik áýe kompanııalary reıster sanyn qysqartyp, otyndy únemdeý sharalaryn qolǵa aldy. Osyndaı jaǵdaıda Qazaqstan azamattyq avıatsııany avıaotynmen qalaı qamtamasyz etip otyrǵanyn bilý úshin Kazinform agenttiginiń redaktsııasy Energetıka mınıstrligine saýal joldady.
Vedomstvonyń jaýabyna sáıkes, qazaqstandyq munaı óńdeý zaýyttary jyl saıyn shamamen 750 myń tonna avıatsııalyq otyn óndiredi. Bul kólem ishki naryqtyń suranysyn tolyq jabady.
Óndiristiń eń úlken úlesi jylyna 315 myń tonna shyǵaratyn Shymkent munaı óńdeý zaýytyna tıesili.
Atyraý munaı óńdeý zaýyty jylyna 215 myń tonna, al Pavlodar munaı-hımııa zaýyty 220 myń tonna avıaotyn óndiredi.
Energetıka mınıstrligi óndiris kólemi benzın men dızel otynyna degen naryq suranysyna baılanysty ózgerýi múmkin ekenin atap ótti.
— Avıaotyn óndirisi halyqqa, aýyl sharýashylyǵy ónimderin óndirýshilerge, jolaýshylar avtobýstary men poıyzdaryna, azyq-túlik, astyq jáne qurylys materıaldaryn tasymaldaıtyn júk poıyzdaryna qajetti áleýmettik mańyzy bar ári suranysqa ıe AI-92 jáne odan joǵary markaly avtobenzınder men dızel otynyna degen qajettilikke qaraı da túzetilýi múmkin. Avtobenzınder, avıatsııalyq otyn jáne dızel otyny ózara baılanysty munaı fraktsııalary bolǵandyqtan, bir ónim túriniń óndirisin arttyrý ekinshisiniń kólemin azaıtady, — delingen mınıstrlik jaýabynda.
Qazaqstan ne úshin avıaotyndy ımporttaıdy?
Azamattyq avıatsııa komıtetiniń málimetinshe, 2026 jyly avıaotynǵa degen jalpy qajettilik 1,2 mln tonnaǵa baǵalanyp otyr. Onyń ishinde shamamen 680 myń tonnasy ishki naryqqa qajet bolsa, taǵy 520 myń tonnasy tranzıttik jáne júk áýe tasymaldaryna qyzmet kórsetý úshin qajet.
Qazaqstandyq munaı óńdeý zaýyttary otandyq azamattyq avıatsııanyń qajettiligin tolyq qamtamasyz etetindikten, qosymsha ımport negizinen Astana men Almaty áýejaılary arqyly ótetin halyqaralyq tranzıttik reısterge qyzmet kórsetý úshin qajet.
Jalpy alǵanda, avıatsııalyq otyn Reseıden, Belarýsten, Qytaıdan jáne Túrikmenstannan ımporttalady.
— Qazaqstan Respýblıkasy Úkimeti men Reseı Federatsııasy Úkimeti arasyndaǵy saýda-ekonomıkalyq yntymaqtastyq týraly kelisim aıasynda jyl saıyn ındıkatıvtik balansqa qol qoıylady. Onda 300 myń tonna kóleminde avıaotyn ımporttaý kózdelgen. Qajet bolǵan jaǵdaıda bul kólemdi 500 myń tonnaǵa deıin arttyrýǵa bolady, — dep habarlady mınıstrlik.
Energetıka mınıstrliginiń dereginshe, 2025 jylǵy jeltoqsannan beri Almaty áýejaıy mańyndaǵy jeke termınalǵa Qytaıdan 1230 tonna Jet-3 avıaotyny jetkizilgen.
Vedomstvo sondaı-aq avıaotyn ımportyna qosylǵan qun salyǵynyń (QQS) alynyp tastalýy jáne úshinshi elderden ákelinetin avıaotynǵa qatysty Eýrazııalyq ekonomıkalyq komıssııa bekitken nóldik kedendik baj mólsherlemesi jetkizilimderdi yntalandyrǵanyn atap ótti.
Buǵan deıin Taıaý Shyǵystaǵy jaǵdaıǵa baılanysty týyndaǵan energetıkalyq daǵdarys aıasynda Lufthansa áýe kompanııasy 2026 jyldyń maýsym-qazan aılary aralyǵynda shamamen 20 myń reısti toqtatýdy josparlap otyrǵany habarlanǵan bolatyn.
