Qazaqstan sheteldik jumys kúshine qolaıly jaǵdaı jasaý mindettemesin almaıdy – zań jobasy

ASTANA. QazAqparat - Búgin QR Parlamenti Senatynyń jalpy otyrysynda «Islam konferentsııasy uıymyna múshe elder arasyndaǵy ekonomıkalyq, tehnıkalyq jáne saýda yntymaqtastyǵy týraly bas kelisimdi ratıfıkatsııalaý týraly» Qazaqstan Respýblıkasy Zańynyń jobasy qabyldandy, dep habarlaıdy QazAqparat.

Zań jobasy  boıynsha negizgi baıandama jasaǵan elimizdiń Ulttyq ekonomıka mınıstri Tımýr Súleımenovtiń aıtýynsha, Qazaqstan Respýblıkasy bas kelisimge 2 eskertpemen jáne 1 málimdememen qol qoıdy.

«Birinshi eskertpe 6-bapqa jasalǵan. Bul bap uıymǵa múshe elderden sheteldik jumys kúshin tartý kezinde jeńildikter  berýdi kózdeıdi. Eskertpege sáıkes, Qazaqstan sheteldik jumys kúshin tartý kezinde qandaı da bir elge qolaıly jaǵdaılar jasaý boıynsha ózine mindettemeler almaıdy. Barlyq memleketterdiń, onyń ishinde uıym azamattary, Qazaqstan Respýblıkasynyń ulttyq zańnamasyna sáıkes tartylatyn bolady. Qazaqstannyń Ortalyq Azııa jáne Aýǵanstanmen aýmaqtyq jaqyn ornalasýy men tyǵyz ekonomıkalyq baılanystary jaǵdaıynda bul másele asa ózekti bolyp tabylady», - dedi mınıstr.

Onyń aıtýynsha, ekinshi eskertpe 8-bapqa jasalǵan. Bul bap Uıym memleketterine jeńildetilgen saýda rejimin usynýdy kózdeıdi.

«Qazaqstan Respýblıkasy Eýrazııalyq ekonomıkalyq odaqqa múshe ekeni belgili. Eýrazııalyq ekonomıkalyq odaqta úshinshi elderge qatysty biryńǵaı syrtqy saýda saıasaty júrgiziledi. Odaq aıasynda qazirgi ýaqytta Izraıl, Iran, Úndistan, Mysyr, Sıngapýrmen erkin saýda týraly kelisimder jasasý jóninde belsendi jumys júrgizilýde. 2016 jyly Vetnammen erkin saýda týraly Eýrazııalyq ekonomıkalyq odaq sheńberindegi birinshi shart kúshine endi. Sondaı-aq, Qazaqstan Táýelsiz memleketter dostastyǵynyń 8 memleketimen qatar bajsyz saýda rejimin kózdeıtin Erkin saýda aımaǵy týraly sharttyń qatysýshysy bolyp tabylady. Osylaısha, Qazaqstannyń ekonomıkalyq múddelerin qorǵaý maqsatynda atalǵan normaǵa eskertpe qabyldandy», - dedi ol.

Sonymen qatar Súleımenovtiń aıtýynsha, Qazaqstan Respýblıkasynyń Úkimeti Bas kelisimniń Qazaqstan Konstıtýtsııasynyń normalaryna qaıshy kelmeıtin erejelerin oryndaıtynyn málimdegen.

«Bul Bas kelisimniń mátininde «Islam memleketi» degen termınniń paıdalanylýyna baılanysty, sebebi Konstıtýtsııanyń 1-babyna sáıkes Qazaqstan ózin demokratııalyq, zaıyrly, quqyqtyq jáne áleýmettik memleket retinde ornyqtyrady», - dedi mınıstr.