Qazaqstan sheteldik jáne qazaqstandyq jumysshylardyń eńbekaqy tólemindegi teńsizdikti erekshe baqylaýǵa almaq
Bul týraly búgin baspasóz máslıhatynda mınıstrliktiń Baqylaý jáne áleýmettik qorǵaý komıtetiniń tóraǵasy Serikqalı Bısaqaev málim etti.
Qazirgi ýaqytta eldegi jaǵdaıdy saralaý maqsatynda mınıstrlikte arnaıy jumys toby quryldy. Sonymen qatar, dısproportsııany azaıtý boıynsha usynystar jasalynady. Bul maqsatta múddeli memlekettik organdar men áleýmettik áriptesterdi jumysqa tartý josparlanyp otyr. Onyń jumysy barysynda zańnamany saqtamaıtyn kásiporyndar tizimi jasalady. Jergilikti qurylymdarǵa tekserý nátıjesinde anyqtalǵan árbir dısproportsııa faktilerin qarastyryp jáne yqpaldy shara qoldanylýy tapsyrylǵan.
«2012 jyly aımaqtyq departamentterdiń eńbek ınspektorlary 17 myń. tekserý jumysyn júrgizdi, onyń ishinde sheteldik 1279 uıym bar. Sondaı-aq, 4621 sheteldik uıymdardyń qatysýymen jumys isteıtin mekemelerde eńbek zańnamasynyń tártibi saqtalmaǵan, onyń ishinde eńbekaqydaǵy dısproportsııanyń 127 faktisi anyqtalǵan. Keıbir mekemelerde tipti qazaqstandyq jáne sheteldik qyzmetkerler arasynda 10 ese aıyrmashylyq baıqalǵan» - dep atap ótti komıtet basshysy.
S.Bısaqaevtyń aıtýynsha, qazaqstandyq jáne sheteldik jumysshylardyń eńbekaqysynda dısproportsııa anaǵurlym kóp kezdesetin faktiler eldiń batys óńirlerindegi sheteldik munaı komanııalarynda jıi anyqtalady eken.
