Qazaqstan sheteldik kombaındardy satyp alýdy shektemek

ASTANA. QazAqparat - Qarjy únemdeý maqsatynda Qazaqstan sheteldik kombaındardy satyp alýdy shekteıdi. Bul týraly Parlament Májilisindegi Úkimet saǵatynda Premer-Mınıstrdiń orynbasary - Aýyl sharýashylyǵy mınıstri Asqar Myrzahmetov málim etti, dep habarlaıdy QazAqparat.

«Ótken jyly kombaındardy satyp alýǵa 3,6 mlrd. teńge jumsadyq. Onyń qyryq paıyzy alys shetelge, al 60 paıyzy TMD elderine tıesili. Atalǵan 40 paıyzyna qarjynyń 70 paıyzy jumsaldy. Osy rette tıisti esepteýlerdi jasadyq, negizinen TMD-da óndiriletin, ıaǵnı bul turǵyda Reseı men Belarýs tehnıkasyn satyp alý eskerildi. Sonymen qatar óziniń tehnıkalyq sıpattamasy boıynsha olar alys shetel tehnıkasynan qalys qalmaıdy. Nátıjesinde, dál sol qarjyǵa kombaın parkin úsh esege arttyrýǵa bolady»,-dedi Myrzahmetov.

Onyń sózine qaraǵanda, lızıngtik baǵdarlama aıasynda «QazAgroqarjy» jelisi boıynsha aýyl sharýashylyǵy tehnıkasyn satyp alýǵa jumsalatyn aqsha kombaındar men tehnıkany óndiretin otandyq zaýytty qurýǵa baılanyp otyrǵan kórinedi.

Atap aıtqanda, búgin qarastyrylǵan AÓK-ni damytýdyń 2017-2021 jyldarǵa arnalǵan memlekettik jańa baǵdarlamasy aıasynda otandyq aýyl sharýashylyǵy tehnıkasyn jasaıtyn óndiristerge qoldaý jasaý qamtylyp otyr.

Osy oraıda A. Myrzahmetov búginde zaýyttar bar ekenin, alaıda olar negizinen daıyn tetikterdi qurastyrýmen aınalysatynyn atap ótti.

«Endi baǵdarlama aıasynda lokalızatsııany arttyryp, otandyq aýyl sharýashylyǵy mashına jasaý salasyn qoldaýǵa daıar ekenimizdi málimdep otyrmyz»,-dedi Myrzahmetov.