«Qazaqstan sheteldik BAQ kózimen» VI halyqaralyq baıqaýynyń jeńimpazdary anyqtaldy
Uıymdastyrýshy komıtettiń qaraýyna óz materıaldaryn sońǵy on eki aıda jarııalaǵan 36 memlekettegi avtordan 60 usynys kelip tústi. Baıqaýǵa qatysýshylardyń jumystary ekonomıka, saıasat, halyqaralyq qatynastar, mádenıet, týrızm, densaýlyq saqtaý, sport, qarýsyzdaný, jańǵyrmaly energııa, Abaı Qunanbaıuly jáne ál-Farabı muralary sııaqty Qazaqstanǵa qatysty keń aýqymdy taqyryptarǵa arnaldy. Materıalar gazetterde, jýrnaldarda, onlaın BAQ-tarda, telearnalarda, podkasttar men ózge de tanymal blog-platformalarda jarııalanǵan. Jalpy alǵanda, uıymdastyrýshylardyń pikirinshe, baıqaýǵa sheteldik jýrnalısterdiń belsendi qatysýy sheteldik BAQ-tyń Qazaqstanǵa degen qyzyǵýshylyǵynyń joǵary ekendigin aıǵaqtaıdy.
Kelip túsken usynystardy qarastyrý nátıjesinde ádilqazylar alqasy kelesi jeńimpazdardy anyqtady. TMD jáne Baltyq elderinen úmitkerlerdiń arasyndaǵy úzdik materıal retinde jýrnalıst Nıkolaı Jýkovtyń (Lıtva) «Kauno Diena» gazetinde jarııalanǵan «Qazaqstan bir jyl ishinde bıliktiń evolıýtsııalyq sabaqtastyǵynyń ózindik úlgisin kórsetti» atty maqalasy tańdaldy. Tsolmon Baterdeneniń (Monǵolııa) «MNB Mongolian National Broadcaster» telearnasynda jaryq kórgen «37 shaqyrymdaǵy 37 jyldyq jospary bar kórshi» atty beınematerıaly men maqalasy Azııa jáne Tynyq muhıt aımaǵynyń elderinen kelip túsken ótinimderdiń ishinde úzdik dep tanyldy.
Pákistandyq avtor Mehmýd Ýl Hassan Hannyń «Islamabad Post» jáne «DNA News» basylymdarynda jaryq kórgen Qazaqstandaǵy saıası jáne ekonomıkalyq reformalardyń ózekti máselelerine jáne Abaı Qunanbaıulynyń rýhanı murasyna arnalǵan maqalalary Taıaý Shyǵys jáne Afrıka óńirinen kelip túsken úzdik materıal bolyp tanyldy. Ońtústik jáne Soltústik Amerıkadan kelip túsken usynystar arasynan úzdik materıal retinde «Kanadanyń birikken qaýymdastyqtary» ÚEU men telejýrnalıst Inga Kerneı-Kelner birlese daıyndaǵan «Qazaqstan kanadalyqtar kózimen» atty beınematerıal irikteldi.
Buǵan deıin atalyp ótkendeı, baıqaý jeńimpazdary Qazaqstanǵa saparmen kelý múmkindigine ıe bolady. Sapar aıasynda olar Nur-Sultan, Almaty jáne Túrkistan qalalaryna, «Býrabaı» demalys aımaǵyna baryp, elimizdiń tabıǵı jáne mádenı nysandaryn aralap, belgili jýrnalıster, dıplomattar jáne qoǵam qaıratkerlerimen kezdese alady. Baıqaý uıymdastyrýshylary «Qazaqstan sheteldik BAQ kózimen» VI halyqaralyq baıqaýyna qatysýshylarǵa alǵys bildire otyryp, olarǵa jańa shyǵarmashylyq tabys pen jetistik tileıdi.
