«Qazaqstan - sheteldik BAQ kózimen» halyqaralyq baıqaýynyń nátıjesi shyqty
ASTANA. QazAqparat - QR Syrtqy ister mınıstrligi men Qazaqstannyń bas redaktorlar klýby shetel jýrnalısteri arasynda ótken «Qazaqstan - sheteldik BAQ kózimen» atty 4-shi Halyqaralyq baıqaýdyń qorytyndysyn shyǵardy, dep habarlaıdy QazAqparat.
Aǵymdaǵy jyly uıymdastyrý komıtetine 29 elden kelip túsken 83 ótinimniń arasynan baıqaý komıssııasy bes óńir boıynsha jeńimpazdardy anyqtady. Sonymen TMD jáne Baltyq elder avtorlarynyń arasynda ázerbaıjandyq Pervane Sýltanova jeńimpaz atandy. Onyń «Qazaqstannyń jańa mıssııasy: energetıkadan beıbit dıplomatııaǵa» atty maqalasy «1news.az» aqparattyq agenttiginiń saıtynda ázerbaıjan tilinde jaryq kórdi.
Qazylar alqasy Eýropa jýrnalısteri arasynan ıtalııalyq Ilarııa Kapıtanıony «Vocal Europe» jýrnalynda jaryq kórgen «Múmkindikter men qıyndyqtar arqyly Qazaqstan jańǵyrý tolqynyna shyqty» atty maqalasy úshin jeńimpaz retinde tanyty.
Kanadalyq Tom Teılordyń «Wildlives.co» saıtynda jarııalanǵan «Qazaqstanǵa barý úshin bes sebep» atty maqalasy Amerıka qurlyǵynyń jýrnalısteri arasyndaǵy eń úzdik maqala bolyp tabyldy.
Azııa, Aýstralııa jáne Okeanııa elderi arasynan qazylar alqasy Ońtústik Koreıanyń ókili Djoel Lıdi «The Korea Herald» gazetinde jarııalanǵan «Etnıkalyq kárister Qazaqstanda tabysqa jetýde» degen maqalasyn tańdady.
Taıaý Shyǵys pen Afrıka elderiniń jeńimpazy - ızraıldik Ýdı Shaham. Ol «The Jerusalem Post» basylymynda «Qazaqstan «Jańa Jibek jolynyń» astanasy róline umtylady» dep atalatyn maqalasyn jarııalaǵan.
Jeńimpazdardan basqa bes óńirdiń árqaısysynda qosymsha úzdik jarııalanymdar atandy, olardyń avtorlary Syrtqy ister mınıstriniń atynan alǵys sertıfıkattaryn alady.
Baıqaý komıssııanyń quramyna QR Syrtqy ister mınıstri Qaırat Ábdirahmanov, Syrtqy ister mınıstriniń orynbasary Roman Vasılenko jáne Bas redaktorlar klýbynyń prezıdenti Erjan Bekhojın kirdi.
Baıqaý erejesine sáıkes, jeńimpazdar tamyz aıynda Qazaqstanǵa, naqtyraq aıtqanda, Astanaǵa, Almatyǵa jáne Býrabaıǵa sapar shege alady. Olar sondaı-aq, «EKSPO-2017» Halyqaralyq mamandandyrylǵan kórmesiniń pavılondaryna, mádenı jáne tarıhı nysandaryna baryp, Qazaqstannyń laýazymdy basshylarymen, sarapshylarmen, jýrnalıstermen, mádenıet, sport jáne týrızm salasynyń ókilderimen suhbattasý múmkindigine ıe.
QR Syrtqy ister mınıstri Q. Ábdirahmanov mundaı baıqaý tek Qazaqstan týraly sheteldegi habardarlyqty arttyrý men halyqaralyq beıbit bastamalarymyzdy nasıhattaý múmkindigi ǵana emes, sondaı-aq baıqaýshylardyń jumystary jarııalanǵan eldermen ekijaqty jáne kópjaqty qatynastardy odan ári damytýǵa qosqan úles bolyp tabylatynyn atap ótti.
«Qazaqstannyń halyqaralyq arenadaǵy róli jýrnalısterdiń baıandamalarynda basty taqyryptardyń biri boldy. Elimizdiń saıası, ekonomıkalyq, mádenı jáne basqa da salalardaǵy jetistikteri sheteldik BAQ-tardyń nazarynan tys qalmady. Munyń bári Qazaqstannyń ishki jáne syrtqy saıasatynyń tabysty ekenin dáleldeıdi», - dedi Q. Ábdirahmanov.
