Qazaqstan shetelden satyp alatyn vaktsınalarǵa qandaı talaptar qoıady
«Qazir qoǵamda vaktsınaǵa qatysty ártúrli pikir bar. Qarsy taraptardyń biri «men ekpege qarsy emespin, biraq olar sapaly bolýy kerek» degendi alǵa tartady. Bbúgin taǵy da Qazaqstanǵa qandaı vaktsınalar ákelinetinin jáne qalaı paıdalanylatynyn aıtyp bereıin. Eń birinshi kezekte vaktsınalarǵa qoıylatyn talaptar: olar qaýipsiz ári qorǵanys ımmýnıtetin kótere alatyndaı, epıdemıologııalyq turǵyda tıimdi bolýy kerek», - dedi Arnur Nurtaev Densaýlyq saqtaý mınıstrliginiń onlaın baspasóz máslıhatynda.
Arnur Nurtaev sheteldik vaktsınalarǵa qoıylatyn osy talaptar qalaı qadaǵalanatynyn aıtyp berdi. Onyń aıtýynsha qazirgi tańda memlekettik tizilimde 64 vaktsına tirkelgen. Aldyn alý ekpeleriniń ulttyq kúntizbesinde balalarǵa arnalǵan 11 vaktsına bar. Naqtyraq aıtqanda balalarǵa týberkýlez, V gepatıtti vırýs, polıomıelıt, kókjótel, dıfterııa, sirespe, qyzylsha, qyzamyq, epıdemııalyq parotıt, gemofıldi jáne pnevmokokk ınfektsııasyna qarsy ekpe jasalady.
«Vaktsınanyń qaýipsizdigi men sapasyn bizdiń Dárilik zattardy, medıtsınalyq maqsattaǵy buıymdardy jáne medıtsına tehnıkasyn saraptaý ulttyq ortalyǵy baǵalaıdy. Vaktsınany memlekettik tirkeý kezinde, ıaǵnı naryqqa engizerde bir, tirkeýden ótkennen keıin taǵy bir tekseremiz. Bul rette tutas sarapshylar toby jumys júrgizedi. Sarapshylar toby alǵashqy kezeńdi óndiris sharttaryn baǵalaýdan bastaıdy. Bul kezeńde ortalyq sarapshylary óndiris alańyna baryp, naqtylanǵan algorıtm negizinde baǵalaý júrgizedi. Biz vaktsına ázirleıtin kásiporynnyń ishki óndiristik qaýipsizdigin qaıta tekseremiz. Ǵımarattyń talapqa sáıkestigi tekseriledi. Eger bizdiń standarttarǵa saı kelmeı qalsa óndirýshimen sol jerde-aq kelisim buzylady. Mundaı kelisimdi qytaılyq, úndistandyq, tipti eýropalyq áriptesterimizben de buzǵanbyz», - dedi ol.
Vaktsınany tekserýdiń ekinshi kezeńi – qujattar saraptamasy. ıAǵnı qujattardyń báriniń de Qazaqstan Respýblıkasynyń zańnamasyna sáıkestigi tekseriledi.
«Biz áý bastan-aq eýropalyq tekserý standarttaryn tańdap alǵanbyz. Ol óte qatań. Ol erejelerdi óndirýshilerdiń kóbi jaqtyrmaıdy. Sebebi bul standarttardyń ýaqyty tym uzaq. Alaıda bul jerde másele azamattardyń densaýlyǵyna qatysty bolǵandyqtan biz álemniń úzdik standarttaryn tańdaǵan jón dep sheshtik. Úshinshi kezeń – mamandandyrylǵan (farmatsevtıkalyq jáne farmakologııalyq dep ekige bólinetin) saraptama. Atalmysh kezeńde vaktsınanyń shynynda da densaýlyqqa qaýipsiz jáne tıimdi ekenin anyqtaımyz», - dedi ol.
Mamandandyrylǵan saraptamadan keıin vaktsınalar analıtıkalyq saraptamadan ótedi. Tórtinshi kezeńde vaktsınalarǵa qaýipsiz ekeni týraly qorytyndy berilse, besinshi kezeńde tirkeý kýáligi tapsyrylady.
Altynshy kezeńde vaktsına tirkeýden ótkennen keıingi qadaǵalaýda bolady.