Qazaqstan shetelden keletin mıgranttardy qabyldaýǵa ázir bolýy tıis - professor T.Qaldybaeva
ASTANA. 26 qarasha. QazAqparat /Arman Asqarov/ - Bolashaqta Qazaqstanǵa keletin mıgranttardyń sany artady.
Sondyqtan olardy qabyldaýǵa qazirden bastap daıyndalý kerek. Búgin Astanada ótken Qazaqstandaǵy kóshi-qon máselelerine arnalǵan konferentsııada professor Tynyshtyq Qaldybaeva osy máselege basa toqtalyp ótti.
Ǵalymnyń málimetine qaraǵanda, álemde tabıǵı ósimniń kórsetkishi jylyna 90 mln. adamdy qurap otyr. Olardyń 80 mln.-y orta nemese nashar damyǵan elderdiń enshisinde. «Árıne, osynshama kóp adamnan quralǵan top bir jerge syımaıdy. Olar tabys izdep, basqa memleketterge shyǵatyn bolady. Al Eýropanyń qartaıyp bara jatqan aımaq ekendigin eskersek, mıgranttardyń basym bóligi erteń Ortalyq Azııa elderine keńinen taraıtyndyǵy aıdan anyq. Qazaqstan da bul úrdisten tys qalmaıdy. Elimizdiń ekonomıkalyq áleýeti ósken saıyn, shetelden keletin jumys kúshi de artady. Sondyqtan bolashaqta Qazaqstanǵa keletin mıgranttardy qabyldaýǵa qazirden bastap daıyndalý kerek dep oılaımyn. Onyń bári órkenıetti túrde ótýi tıis», - deıdi professor.
Aıta keteıik, Astana qalasy ІІD Kóshi-qon polıtsııasy basqarmasynyń ókili Beıimbet Úsipbektiń usynǵan aqparaty boıynsha, aǵymdaǵy jyldyń sońǵy 9 aıy ishinde 67 myńnan astam shetel azamaty tirkelgen. Bul ótken jyldyń atalǵan kezeńimen salystyrǵanda, 8 myńǵa artyq.
