Qazaqstan shetelden asyl tuqymdy iri qara mal ımporttaýdy toqtatpaq

ASTANA. QazAqparat - Qazaqstan shetelden asyl tuqymdy iri qara mal ımporttaýdy toqtatpaq. Bul týraly búgin QR Parlamenti Májilisi Agrarlyq máseleler jónindegi komıtetiniń otyrysynda Aýyl sharýashylyǵy mınıstri Asyljan Mamytbekov málim etti.

Mınıstrdiń atap ótýinshe, «Іri qara mal etiniń eksporttyq áleýetin damytý» baǵdarlamasy qolǵa alynǵan sátten bastap elimizge shamamen 50 myń bas iri qara mal ákelingen. Al 5 jylǵa arnalǵan josparǵa sáıkes 72 myń bas iri qara jetkizilýi tıis edi.

«Degenmen biz qazirdiń ózinde ishki ósip-ónýdiń nátıjesinde eldegi asyl tuqymdy mal basyna qajettiliktiń tómendegendigin baıqap otyrmyz. Biz ende bul qoldaý baǵdarlamasyn toqtatamyz. Biraq, bıznes áli de bolsa mal ákelýge nıet tanytyp otyr»,- dedi ol.

A.Mamytbekovtiń sózine qaraǵanda, joba alǵash bastaý alǵan sátte asyl tuqymdy maldyń tiri salmaqtaǵy 1 kelisi 2500 teńgege deıin jetken. Al qazirgi ýaqytta mal basynyń kóbeıýine baılanysty 1300-1500 teńgege deıin tómendegen.

«Bul fermerlerdiń satyp alýyna qoljetimdi baǵa. Sondyqtan da ımporttaýdyń asa qajettiligin kórip otyrǵan joqpyz», - dedi ol.