Qazaqstan sheteldegi myńnan astam jyljıtyn jáne jyljymaıtyn múlik derekterin tekserip jatyr
ASTANA. KAZINFORM – Qazaqstan sheteldegi myńnan astam jyljıtyn jáne jyljymaıtyn múlik derekterin tekserip jatyr. Bul týraly Bas prokýratýranyń Aktıvterdi qaıtarý jónindegi komıteti tóraǵasy Nurdáýlet Súıindikov aıtty.
«Aktıvterdi qaıtarý jónindegi komıtet derekterdiń keń aýqymymen jumys jasap jatyr. Elimizdegi jáne sheteldegi myńnan astam jyljymaly jáne jyljymaıtyn múlik obektileriniń derekteri zerdelenip otyr. Bank shottary men tranzaktsııalar boıynsha málimetter taldanýda. Onyń ishinde 1,5 trln teńgege shekti jáne kúdikti operatsııalar bar. Birqatar kásiporyndy satý týraly, jer qoınaýyn paıdalanýǵa jasalǵan kelisimsharttardyń, baǵaly qaǵazdar jáne iri kompanııalardaǵy úlesterge qatysty mámilelerdiń zańdylyǵy tekserilip otyr. Nátıjeleri boıynsha jetkilikti negizder bolyp jatqan jaǵdaıda komıssııanyń maquldaýymen aktıvterdi qaıtarý jónindegi sharalar qoldanylatyn bolady», - dedi komıtet tóraǵasy Ortalyq kommýnıkatsııalar qyzmetindegi brıfıngte.
Onyń atap ótýinshe, komıtet urlanǵan aktıvterdi qaıtarý jóninde Birikken Ulttar Uıymy men Dúnıejúzilik banktiń StAR bastamasymen ózara is-qımyl jasalǵan. Interpoldyń «Kúmis bıýlleten» jáne «Kúmis habarlama» atty aktıvterdi qaıtarýdyń jańa quralyn ázirleý jónindegi jumys tobyna belsendi qatysqan.
«Eýropa keńesi komıtet úshin úlken derekterdi taldaý jáne vızýalızatsııalaý baǵdarlamasyn satyp áperdi. GLOBI jahandyq sybaılas jemqorlyqqa qarsy jedel jelisine múshelikke kirdik. Aqparatpen almasý arnasyn ornattyq. Birikken Ulttar Uıymy Esirtkige jáne qylmystylyqqa qarsy basqarmasynyń qoldaýymen aktıvterdi qaıtarý tetikterin jetildirý, komıtet qyzmetkerleri úshin oqytý trenıngterin uıymdastyrý boıynsha birqatar sharalar iske asyrylyp otyr. Eýropadaǵy qaýipsizdik jáne yntymaqtastyq jónindegi uıymymen birlesip, aktıvterdi qaıtarý boıynsha keshendi joba ázirleý pysyqtalyp jatyr», - dedi Nurdáýlet Súıindikov.
