Qazaqstan sheteldegi qandaı iri saýda jelilerimen kelissóz júrgizip jatyr
ASTANA. KAZINFORM – Keıingi bes jylda joǵary óńdelgen ónim eksporty 2,5 esege ósti. Bul týraly Úkimet otyrysynda Saýda jáne ıntegratsııa mınıstri Arman Shaqqalıev málim etti.
- Qarjylyq qoldaý sharalary keńeıip keledi. Birinshi jartyjyldyqta ǵana Eksporttyq-kredıttik agenttiktiń saqtandyrý qoldaýynyń kólemi 400 mlrd teńgeden asty. Jyl sońyna deıin ol 1,2 trln teńgege deıin ulǵaıtylady. Jyl saıyn shamamen 6 mlrd teńge eksporttaýshylardyń logıstıkalyq shyǵyndaryn óteýge baǵyttalady. Nátıjesinde, eksport qurylymy ózgerip keledi. Sońǵy bes jylda joǵary óńdelgen ónim eksporty 2,5 esege ósip, 11,1 mlrd AQSh dollaryn qurady. Onyń shıkizattyq emes eksport qurylymyndaǵy úlesi 38,8 paıyzǵa jetti, - A.Shaqqalıev.
Onyń aıtýynsha, kelesi kezeń – daıyn ónimdi syrtqy naryqqa ilgeriletý. Ol úshin otandyq ónimdi Lulu Hypermarket, Carrefour, Gross, Panda, Spinneys jáne taǵy basqa iri sheteldik saýda jelileriniń sórelerine ornalastyrý jónindegi jańa qoldaý sharasy pysyqtalyp jatyr.
- Mınıstrliktiń strategııalyq mindeti – qazaqstandyq taýarlardyń ishki naryqta nyǵaıtyp, olardyń syrtqy naryqtarǵa shyǵýyna jáne joǵary qosylǵan quny bar ónim óndirisiniń ósýine jaǵdaı jasaý. Saýda saıasaty men memlekettik qoldaý sharalary budan ári de otandyq óndiristi damytýǵa baǵyttalady, - dedi mınıstr.
Buǵan deıin habarlanǵandaı, jarty jylda ishki taýar aınalymynyń kólemi 36,2 trln teńge boldy.
