Qazaqstan shetel azamattaryna JSN berýdi qaıta bastaıdy

ASTANA. KAZINFORM — Elimiz 18 sáýirden bastap shetel azamattaryna jeke sáıkestendirý nómirin (JSN) berýdi qaıta bastaıdy. Pılottyq jobaǵa 100 elshilik pen konsýldyq qatysady. Bul týraly Іshki ister mınıstrligi habarlady. 

— Zańnamaǵa sáıkes, sheteldikter men azamattyǵy joq adamdarǵa JSN resimdeý Qazaqstan aýmaǵynda olar jeke júgingen kezde ǵana júzege asyrylady. JSN berý jumystaryn burynǵydaı ІІM júrgizedi. Biraq bul qyzmet shetel azamattary úshin SІM men elshilik ǵımarattarynda da qoljetimdi, — deıdi vedomstvo ókilderi.

Elimizde jeke sáıkestendirý nómirin ala alatyn sheteldikterdiń tizimi tómendegideı:

áleýetti ınvestorlar;

taýarlardy tańbalaý jáne qadaǵalap otyrý júıesine qatysýshylar;

Qazaqstan azamattarynyń jubaıy bolatyn shetel azamattary (AHAT aqparattyq júıesinde azamattyq hal aktilerin tirkeý týraly belgi qoıý úshin);

ata-anasynyń biri Qazaqstan azamaty bolǵan jaǵdaıda, 16 jasqa tolmaǵan sheteldik balalar;

Qazaqstanda muragerlik quqyǵyn ıelenetin shetel azamattary;

Digital Nomad Residence jáne Digital Nomad Visa baǵdarlamalarynyń áleýetti qatysýshylary;

múmkindigi shekteýli shetel azamattary;

65 jastan asqan sheteldikter;

ósimdikterdi qorǵaý quraldaryn (pestıtsıdterdi) óndirýshiler men tirkeýshiler;

Qazaqstanda tirkelgen zańdy tulǵalardyń, fılıaldardyń jáne (nemese) ókildikterdiń basshylary.

Aıta keteıik, JSN alý úshin ótinishińizdi, jeke basyńyzdy kýálandyratyn qujattyń kóshirmesi men túpnusqasyn jaýapty mekemege alyp barýyńyz kerek.

Buǵan deıin Reseı azamattaryna berilgen JSN-niń bir bóligi rásimdi buza otyryp rásimdelgeni habarlanǵan edi.  Odan bólek, boryshkerler men lýdomandardy JSN arqyly anyqtaý tetigi engizilýi múmkin.