Qazaqstan shet memleketterge aptasyna 63 baǵytta 247 reıs oryndaıdy

NUR-SULTAN. QazAqparat – Qazaqstanda ishki avıareıster tolyǵymen qalpyna keltirildi. Al shet memleketterge aptasyna 63 baǵytta 247 reıs oryndaıdy. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.

Jyl basynan beri salada byltyrmen salystyrǵanda kórsetkishter birshama artqan.

«2021 jyldyń toǵyz aıynda tasymaldanǵan jolaýshylar sany 81% artyp, 6,9 mln adamǵa jetti. Áýejaılarda qyzmet kórsetilgen jolaýshylar sany 70% artyp, 12,6 mln adam (2020 jyldyń 9 aıynda – 7,4 mln adam, 2019 jyldyń 9 aıynda - 12,3 mln adam) boldy.

Búgingi tańda ishki reıster tolyqtaı qalpyna keltirildi (aptasyna 57 baǵytta 744 reıs). Sondaı-aq 23 memleketpen (Túrkııa, Koreıa, BAÁ, Belarýs, Ýkraına, Germanııa, Ózbekstan, Qyrǵyzstan, Mysyr, Reseı, Grýzııa, Tájikstan, Polsha, Nıderland, Chernogorııa, Armenııa, Ulybrıtanııa, Vengrııa, Maldıv, Ázerbaıjan, Katar, Shrı-Lanka, Taıland) aradaǵy halyqaralyq reıster (aptasyna 63 baǵytta 247 reıs) qaıta ashyldy», - delingen taratylǵan málimette.

Aqparatqa sáıkes, ortasha eseppen alǵanda ishki baǵyttarda kúnine 106 reıs, halyqaralyq baǵyttar boıynsha 35 reıs oryndalady.